Reapertura ta bay duna loke ta kere?
Den e lunanan cu ta bin hopi cos lo keda dicidi cu ta crucial pa e rumbo cu nos economia por tuma. Nos tin e decisionnan cu mester tuma pa loke ta e futuro di e refineria y di San Nicolas; e reforma fiscal cu lo bin of no, cu consecuencia grandi pa entre otro su efecto riba inflacion. Tambe nos tin e resultadonan di posibel exploracion di gas den nos awanan teritorial, cu mas a largo plaso por tin efecto riba nos futuro economico. Mirando tur esaki ta di suma importancia pa mantene cabes friu y keda mira e ‘big picture’ den cual nos mester opera. Y esey significa tambe keda haci e preguntanan clave na nos gobernantenan specialmente ora nan cu hopi entusiasmo ta anuncia plannan nobo cu segun nan ta di suma importancia pa nos pais.
Un di e puntonan grandi den e discusion actual ta e posibel reapertura di e refineria. Di banda di gobierno como tambe di oposicion nos ta tende continuamente con importante reapertura ta pa nos economia, y mas cu tur cos, pa caha di gobierno. Claro cu nos conoce e discusion di semper cu turismo como unico pilar economico ta un riesgo grandi, pero realmente tin un otro sector cu por brinda nos e stabilidad cu nos ta desea? Tuma por ehemplo e refineria mes: esaki no a pasa den un ‘roller coaster’ durante e ultimo 30 aña y pa un motibo? E motibo ta cu pa mas di 30 aña ningun operador realmente a considera factibel pa haci e inversionnan grandi cu tabata mester pa pone e refineria den e posicion cu e tabata prome cu Exxon a dicidi di bay. Den e añanan despues, e inversionnan haci a hiba e refineria den un otro rumbo, di un planta cu no ta entrega producto acaba, manera gasolin y diesel, pero producto intermedio pa cual awor mercado internacional no ta faborabel y lo bay keda asina pa basta tempo. Un di e motibonan ta e situacion na Merca, unda produccion interno di crudo liviano a crece tanto, cu tin menos necesidad di importacion di crudo y di ‘intermediate feedstocks’, manera refineria na Aruba por produci.
Nos por drenta un fase diferente di uzo di e refineria na man di PDVSA y su filial Mericano CITGO: produci nafta pa hiba Venezuela pa sirbi como diluyente pa e crudo ultra pisa cu ta bin di Orinoco. Esaki no ta exigi uza henter e planta y tampoco lo significa un renobacion completo. Na fin di 2013 Valero y PDVSA a sinta na mesa tocante exactamente e mesun asunto aki y no por a yega na otro. Un di e problemanan principal tabata cu PDVSA no tabatin e medionan financiero pa inverti y tabata desea pa Valero haci e inversionnan necesario anto haya pago di PDVSA den forma di crudo entrega pa refinamento na Merca. Pero Valero, menos ainda cu dos aña pasa, awor no tin mester di crudo Venezolano mas, pa motibo di e abundancia di crudo na Merca mes, manera nos a caba di splica. Si acaso e dos companianan yega na un acuerdo lo ta uno unda ta usa e facilidadnan manera nan ta awor.
Valero no mester inverti y PDVSA ta enfoca actualmente riba e creacion na Venezuela mes di seis ‘upgrader’ hunto cu diferente compania internacional, cu dentro di poco aña lo haci e ruta di produci nafta via Aruba uno obsoleto.
Pero tin mas pregunta relaciona cu esaki: si ta berdad cu CITGO ta bin opera pa un tempo cortico, esaki ta trece e pregunta atrobe, ta ken ta bay keda cu e responsabilidad di haci henter e tereno limpi si aki poco aña di tur manera no tin refineria mas? Lo ta interesante tambe pa sa di gobierno ki ley ambiental nan kier introduci den pura cu cual e refineria mester cumpli, si acaso gobierno ta serio den su intencion pa mehora e situacion ambiental na San Nicolas. Awor aki no tin nada!
Y mientras tanto, e uzo parcial di e refineria lo genera trabao pa cuanto hende y pa ken? Nos no lubida cu na e reapertura na 2011 ta mas tanto stranhero a keda emplea na e contratistanan, anto no bin cu e argumento cu e reapertura ta pa emplea hende local. Loke nos mester realisa cu e refineria ta den un fase cu nos por yama ‘e ultimo parada prome cu cementerio’. Si esey ta e caso, anto ta importante pa nos bay den un deal asina, of ta opta pa corta awor y crea otro futuro pa San Nicolas, y de paso pa Aruba? No mester descarta e efecto cu tres aña di aire limpi ta haci den mente di hende; tin hende cu a cuminsa aprecia esey. San Nicolas ademas no a deteriora desde tres aña pasa ora e refineria a cera. E San Nicolas di awe cu tur hende kier mira drecha, tabata t’ey caba durante ultimo trinta aña. Habri e refineria pa un par di aña ta bay yuda den esey?
