Ayera prome minister a firma e decreto cu eleccion lo tuma luga diabierna 22 di september. Entrega di lista di partido na Conseho Nacional Electoral ta riba 4 di augustus. Ya por mira hopi parlamentario campañando y asina no atende reunion den parlamento.
E ultimo remarca ta bin for di presidente di parlamento, Mervin Wyatt Ras cu ta splica cu normalmente un parlamento ta keda funciona ta na final.
“Nos ta pone reunion pa ehempel di cierto asuntonan bo no ta mira cu hopi parlamentario ta bin manera cu tabata prome”, e presidente ta bisa. Esaki ta un indicacion evidente cu hopi ya caba ta cuminsa prepara nan mes pa campaña, segun e.
Pago sin cu ta traha
Considerando su experiencia den politica, sra. Wyatt-Ras ta anticipa cu unabes cu luna di mey drenta “bo ta bay haya cu cosnan no ta cana, manera cu e mester cana.” Aworaki caba ta wordo ripara cu no tin mucho parlamentario cu no ta bin reunion. Den sector publico no ta cuestion cu si bo “no job no pay”, ya cu nan ta protegi segun e ley LMA. Te hasta e parlamentario cu ta keda suspendi ya sea pa mal comportacion, agresion verbal te hasta fisico, ta haya su pago.
Presidente di Parlamento a bisa cu nan ta urgi gobierno y otro instancia cu ta trahando riba leynan pa nan keda cla cu nan. Pa nan no drenta mucho laat pa no confronta cu no tin e ambiente pa trata e leynan, ya cu fecha di eleccion na september ta na caminda. Ademas parlamento tin un reces na juli te cu mita di augustus. Pues di mita di augustus pa september ta un periodo cortico prome cu eleccion.
“Bo no ta bay haya hendenan bin reunion”, atrobe e ta expresa. E ta kere cu si e leynan pendiente pa trata nan ta cuminsa drenta prome cu mey, ainda tin chens pa wordo trata. Ya cu pa final di mey ya e motivacion pa bay parlamento di parti di nan miembronan ta cuminsa baha substancialmente.
