Hopi nubia ta stroba accion rescate La Rumbera.

E boto La Rumbera, perdi desde diahuebs cu 9 persona abordo, ainda no a keda localisa. Diferente unidad di kustwacht, marina y tambe di banda di Venezuela y Colombia ainda ta buscando despues diasabra merdia e capitan di e boto a logra establece contacto telefonico.
Pero despues di e yamada aki, no a logra haya contacto bek. Diadomingo mainta a reanunda e accion di rescate pero te awor esaki no a resulta positivo. Representante di famia, Uri Croes, a pone riba su Facebook: “Awe ta e dia. Closing down riba e location di e boto. Bon noticia ta cu awa ta jobiendo unda nan ta tambe cu nan por collect drinking water.”

Sinembargo kustwacht ta informa Bon Dia 24 cu ‘nunca bo sa den casonan asina’ y ‘lama ta grandi’. Tambe tin hopi nubia pa motibo di e tempo instabil den nos region, y esaki ta stroba bista, segun vocero Roderick Gouverneur di kustwacht.