– Den e ultimo añanan Stichting Monumenten Fonds Aruba (SMFA) a bin ripara cu tabatin hopi muchanan di scol basico y te hasta di otro scolnan mas avansa, cu no sa ni sikiera cu e palabra monumento ta nifica.
Pa tal motibo, SMFA ta bin trahando no solamente pa busca fondo pa restaura nos edificionan monumental, sino pa conscientisa specialmente nos futuro generacion riba balor y importancia di nos monumentonan.
Nos Herencia
PR di SMFA, Mircla Nava a declara na Bon Dia Aruba cu e aña aki nan a lansa riba area di educacion nan proyecto “Nos Herencia”. “Nos a haya hopi importante pa trece e informacion aki dilanti y nos a cuminsa nos programa Nos Herencia”, el a bisa.
E programa aki ta consisti cu e fundacion aki ta haci presentacion den e scolnan respective, caminda nan ta duna tur informacion basico rond di monumento, dicon nan ta importante pa nos, y fundamentalmente con nan por contribui pa yuda cuida nan. E punto aki ta importante, ya cu hopi di nos por corda con E Faro cu a wordo renoba recientemente a bira victima di acto di vandalismo cu graffiti riba dje.
Esaki ta un proyecto cu SMFA conhuntamente cu e mayoria di nos comunidad ta sinti su mes orguyoso di dje. E ta un proyecto grandi cu nan a bin preparando for di cuater aña pasa y cu hopi orguyo nan a finalisa e aña aki. Awor e ta habri pa tur e bishitantenan cu por subi y disfruta di un bunita bista ariba di E Faro, directora di SMFA, Ir. Anne E. Witsenburg a declara na e matutino aki. Aunke e monumento aki cu ta un icono di nos pais ta cla, awor nan mester percura cu e mantencion di e monumento aki.
Mientras cu e proyecto Nos Herencia lo finalisa otro aña na luna di Maart, caminda scolnan interesa lo participa di un exposicion of presentacion. E fundacion aki tin sosten di Aruba Bank y Unoca, caminda nan lo por gana un premio di 5 mil florin. E iniciativa di e actividad aki ta pa stimula nan mes pa busca informacion tocante monumento, trahamento den grupo, etc.. SMFA lo sigui otro aña academico dunando informacion na scolnan vooral pa e muchanan cu e meta cu nan sa kico ta un monumento y su importancia.
Hopi mucha a keda envolvi den e proyecto aki. Mas of menos un 1200 mucha di 16 scol cu sa awor kico ta un monumento. Tambe cu ayudo di studiantenan di Instituto Pedadogico Aruba (IPA)a haci un proyecto y producto di dje a resulta un buki caminda nan ta haya informacion, preguntanan, tareanan cu e mucha por haci.
Actualmente e fundacion ta den e fase di duna forma na e buki aki y otro aña na Maart, nan lo presente, caminda cada scol lo haya e buki aki. E muchanan lo por siña mas tocante e monumentonan y nan areanan realisando actividad cu nan tanto na Oranjestad como na San Nicolas.
Expo
Tambe e fundacion a traha cu EPI caminda aña pasa nan a drecha e mecanismo di E Faro, y e aña aki nan a haci of traha riba e lens. E material interesante aki lo forma parti di otro proyecto pa 2017, caminda nan lo organisa un exposicion. E idea ta cu e lo bira un expo cu SMFA lo por move den diferente area pa asina comparti e informacion aki cu mas miembro di nos comunidad posibel. E expo aki ta plania pa inicia den e terminal di crucero pa asina e turistanan por haya tambe un tiki di informacion tocante E Faro su historia y importancia.
Esaki ta algun aspectonan cu SMFA ta bin realisando riba tereno di educacion. Tambe nan tabatin nan luna di monumento cu nan ta bin realisando durante e ultimo tres aña cu e ayudo valioso di diferente partner cu ariba nan mes tambe ta organisa actividadnan pa haci e luna aki mas grandi. E otro aña premirando cu tin eleccion e no lo tuma luga na september, sino cu nan lo bay hinc’e den otro luna conhuntamente cu otro actividadnan.
