(NLTimes) – Marechaussee a aresta 123 persona sospecha di traficacion di hende aña pasa, cual ta un aumento di 40% compara cu 2019, NOS a reporta. Mayoria di traficador di hende a keda aresta cerca di centro di recepcion pa solicitante di asilo na Ter Apel.
“Eynan so tabatin 45 aresto. Nos ta tende storia cu algun persona a paga cinco pa dies mil euro pa wordo hiba na e trottoir na e centro di solicitud di asilo”, segun Robert van Kapel di Marechaussee, un brasa militar encarga en parti cu vigilancia di frontera.
Autoridadnan na Hulanda ta trahando cu nan contraparte na Belgica y Alemania riba e asunto. Van Kapel a bisa cu tin mas reporte di migrantenan indocumenta purbando di bula for di trucknan na momento cu ta ehecutando control na e fronteranan. “Te aki algun aña lo bira cla si tin un tendencia”, el a bisa, referiendo na esaki como “un fenomeno hopi serio.”
De Telegraaf tambe a reporta cu 173 documento falso of falsifica tambe a keda intercepta na Ter Apel aña pasa na momento cu solicitantenan di asilo a presenta esakinan durante un aplicacion pa refugio na Hulanda. Den mayoria di caso, esakinan tabata documentonan falsifica door di altera stempel di entrada of cambia fecha di nacemento.
Segun e team lider di e Centro pa Fraude di Identidad y Documentacion, esaki por pasa pa varios motibo. Algun ciudadano stranhero ta bin di paisnan cu ta duna tiki oportunidad di ricibi asilo na Hulanda, y pa e motibo aki ta intenta usa e documentonan cu meta di aumenta nan probabilidad di obtene documentonan di residencia.
“Fraude tambe por resulta di e hecho cu aplicantenan di asilo no kier pa por track na identidad real. E motibonan pa esaki por ta hopi diverso”, representantenan di e organisacion a declara na e corant.
Cifranan di Marechaussee ta mustra cu ciudadanonan di Siria mas frecuentemente a wordo gara pa fraude di documento falso, un total di 83 biaha, sigui pa ciudadano di Turkia, Irak, Yemen, Afghanistan y Iran.
