Universidad di Aruba tin hopi mas inscripcion pa e aña academico nobo compara cu aña pasa. E cifranan exacto no ta conoci ainda pero segun Charisse Hoen-Daly coordinador di asuntonan di studiante, por mira un crecemento grandi.
“’Maske tin hopi studiante cu ta bayendo afo, Universidad di Aruba ta birando popular pasobra studiantenan sa kico nos por ofrece nan.”
E inscripcion no a cera ainda pues e siguiente cifranan no ta oficial, pero e averahe mas o menos di cantidad di studiante cu a inscribi pe aña academico 2016-2017 ta lo siguiente: pa facultad di Ley nos tin 27, pa e facultad di Hospitalidad,Turismo y Maneho nos tin 25, e facultad di Social Work & Development tin 10, Organization, Governance & Management nos tin 16, pa e facultad di Economia & Marketing nos tin 88 studiante y pa nos facultad di Academic Foundation Year cual ta e programa nobo cu nos ta ofrece, nos tin 63 studiante. Asina sra. Daly ta splica Bon Dia.
Orientacion
E siman aki Universidad di Aruba ta bay cuminsa cu nan programa di orientacion.
‘”Durante e temporada di e siman di orientacion, nos ta laga e studiantenan ser conoci cu esnan cu ta traha den facultad, pero tambe riba un manera cu weganan pa nan ser conoci cu kico tur Universidad di Aruba por ofrece. Nos no tin un campo manera otro Universidadnan grandi unda studiante ta biba, pero nos tin diferente organisacionnan di studiante hopi activo, y manera tur hende por a ripara, Universidad ta duna bo oportunidadnan global”, sra. Daly ta splica.
Programa nobo
Segun Sra. Daly ta bisa, e aña aki tin hopi interes tambe den e programa nobo Academic Foundation Year pasobra nan a ripara cu hopi studiante ainda ta duda kico nan kier studia. “Academic Foundation Year no ta solamente pa esunnan cu ta bayendo Universidad, pero esaki ta un aña pa uza manera un tipo di ‘brug’, sea di HAVO of EPI si bo tin duda den kico bo kier studia. E programa aki ta un cooperacion entre minister di Educacion y Universidad di Aruba pa bini cu un aña pa duna studiante mas contenido di idioma, con bo tin cu studia y hopi mas pa asina ki nan por para mas fuerte den nan sapato cu ora nan haci un escogencia sea na Universidad di Aruba, Curaçao, Hulanda of Merca, nan lo ta miho para den nan sapato y cu conocemento di nan mes anto tambe cu bon dominio di nan idioma cual ta un problema masha grandi mes akinan na Aruba.”
Pa cu e siman di orientacion lo siguiente: e prome programa ta cuminsa diamars 16 di augustus 4or pa 9or di anochi caminda studiante hunto cu rector ta bay yama tur hende bon bini. Bo ta bay ser conoci cu esunnan den bo mesun facultad y tambe e programa cu lo spera bo pa e aña academico aki. E siguiente dianan ta riba diaranson 17 di augustus for di 1or te cu 7:30 di anochi anto diahuebs 18 di augustus for di 10:15 di mainta te cu 7or di anochi.
