Rond di Aruba tin varios luznan publico cu ta victima di fayonan tecnico. Hopi di nan ta keda cendi durante di dia y tin otronan cu no ta traha mes. Elmar ta ricibi keho riba esaki pero nan ta informa cu esaki no ta totalmente nan responsabilidad. E compania estatal ta comparti e parti di mantencion cu Dienst Openbare Werken (DOW) kende ta bisa cu tin dialogo pa laga Elmar so maneha esaki den futuro.
Jossy Kock di DOW ta bisa cu e maneho y mantencion di e palo di luznan pa iluminacion publico ta consisti di dos parti. Tin algun parti di iluminacion cu ta cay bou gobierno mes, anto bo tin e partinan cu ta cay bou di Elmar. Den e caso aki Elmar ta autorisa pa haci mantencion riba tur e luznan rond di Aruba e.o. barionan y riba caminda publico. “Esaki ta na unda cu bo ta haya e luznan publico, tambe por ehempel esunnan na Linear Park. E luznan cu ta cay bou di DOW tambe ta esunnan den Caya Betico, na San Nicolas y Noord.” Ta hibando combersacion pa laga tur e luznan cu tin na Aruba cay totalmente bou di Elmar. “Ta combersacionnan cu no a concretisa ainda. Esey ta pa percura pa un instancia so maneha tur e luznan publico na Aruba. E problema ta sinta na ora bo ta manteniendo stock di un tipo di luz, ta bira dificil despues pa mantene stock di dies diferente tipo. Tur esey tin cu wak con ta yega na otro pa asina nos por concretisa esaki,” sr. Kock ta splica.
Censor daña
E ta bisa cu hopi di e luznan aki cu ta keda cendi den dia ta traha cu censornan cu ta depende di claridad. Entre esakinan tin algun luznan cu ta depende di un timer. Ora cu coriente bay, e timer ta bay for di ora y bo ta haya bo cu enbes cu e luz ta cende anochi, e ta bay cende den dia. “Esey tambe mester ahusta. Ora cu e censornan ta daña sea e luz ta keda cendi of e no ta cende mes.” Ta asina cu segun DOW, e censornan ey no ta comunica cu un sistema avansa unda cu e ta duna bo un señal cu e ta kima. Ora cu haya melding y ta asina cu ta trata di luznan di gobierno, nan ta manda hende pa check esakinan mesora.
Gastonan
Jonathan Van der Linden, specialista di mantencion na Elmar ta conta Bon Dia Aruba cu tur e kehonan di luznan cendi den dia ta mastanto drenta cerca nan. “Pa locual ta e rotonde di aeropuerto, e Linear Park parti banda di pazuid di caminda di Talk of The Town bay abou tur ta cay bou di DOW. Nos ta mantene esakinan mas o menos, kiermen mantene e parti di luz. Pero si e keda cendi of tin un problema tecnico, esaki ta responsabilidad di DOW.”
Pa locual ta e otro luznan cu ta cay bou di Elmar: nan ta den un proceso cu un proyecto nobo pa locual ta instalacion di luznan publico cu tin algun tardansa. Mayoria di biaha ora di instala luznan nobo e ta keda cendi te ora cu e haya su schedule pa cende y paga cual ta algo tumando luga frecuentemente. Tambe nan ta den proceso haciendo “trouble shooting” di e luznan cu no ta traha. Sr. Van der Linden ta bisa: “Tin varios caminda cu nos no por haci nada sin consulta DOW.
Locual cu si nos ta haci ta tuma tur e kehonan anto pasa esaki pa nan.” E luznan cu ta cay bou di DOW tin un meter cu ta midie kwh-nan dedica. Kiermen si e luznan ey keda cendi, e meter ta keda draai anto finalmente DOW tin cu paga pa e luznan cual ta keda cendi extra. Tin varios caminda cu nan tin e meter por ehempel na e sistemanan di irigacion (cu ta uza tiki coriente y mayoria awa) anto luznan publico. Elmar ta nota esaki tur luna y manda DOW e cobransa. Bon Dia Aruba a puntra pero no a logra haya algun cifra di esaki.
