Departamento di Asunto di Consumidor ta bay traha riba e tereno di conscientisacion riba e leynan cu ta proteccion di e consumido, asina Sr. Luciano Maduro a declara na Bon Dia Aruba.
Nan tin pensa di intensifica e parti di conscientisacion pa nos consumidor. Nan ta trahando riba nan plataforma digital, ya sea website, Facebook y Twitter riba e tereno di conscientisacion. Pero e ta reconoce cu e departamento aki nan fondo ta limita y pa tal motibo nan ta bay haci uzo pa di relacion publico.
Contratistanan
Tambe nan lo organisa atardi y anochi informativo cu gruponan di interes specifico. Un di nan tin di haber cu contratista, ya cu e departamento aki ta haya hopi keho contra e contratistanan.
“Esaki ta e keho di claim mas halto. E interes di e consumido den dje ta hopi grandi, ya cu ta trata di un cas”, segun Sr. Maduro.
P’esey nan tin pensa di organisa un actividad di informacion caminda nan lo invita un grupo di contratistanan. Tambe lo wordo duna un presentacion riba kico e ley ta. Tambe nan lo duna un ehempel di un bon contract.
Igualmente e intencion di e tipo di evento aki ta pa e consumido sa cu ta existi un departamento cu literalmente tin nan portanan habri pa nan. E ta kere cu e tipo di conscientisacion aki lo yuda pa baha e cantidad di keho di e consumidonan riba e parti di e trabou realisa pa contratista riba e sector di construccion.
Kehonan
E keho aki contra nan ta halto ya cu ora cu e consumidor ta hinca su mes den un proyecto asina, caminda tin den wega hopi placa cu e consumidor a spaar cu hopi sacrificio, of generalmente nan a hinca nan mes den un debe.
“E ta duel nos ora cu e consumidor ta bin te akinan pasobra e contratista a pone e trabou abou, y el a keda cu e mayoria di e placa”, el a bisa. Pero e situacion ta bira mas dificil, ya cu no ta resta placa pa e consumidor por busca un abogado.
E tipo di situacion aki a yega di pasa y departamento aki ta haya importante pa cuminsa cu un reunion informativo y di conscientisacion cu e contratistanan.
Otro grupo cu nan lo kier yega na dje ta esun di mecanico di auto. Tambe nan ta bin hayando keho di e consumidonan ya cu tin mecaniconan cu no ta serio. Pero el a indica cu tin e situacion tambe cu e trabou di mecanico no ta facil, ya cu tin incidente cu por pasa cu no necesariamente ta fout di e mecanico, sino di e situacion precario di e auto.
Pa atende cu e topico aki sigur nan mester incorpora e uzo di experto pero e problema ta mara na e falta di fondo cu e departamento aki cu ta resorta den ministerio di Economia tin pa por paga un experto.
