Departamento di Comision di Huur y Consumidor ta haya hopi keho contra e contratistanan cu no ta cumpli. Pa motibo di esey nan lo bay reuni cu contratistanan y considerando pa bin cu un plataforma estilo ‘Tripadvisor’.
E consumidor ta sinti e necesidad di un tipo di plataforma, unda nan por revisa e trabou di e contratista pa medio di opinion expresa riba e trabou realisa, asina Luciano Maduro di e departamento ta bisa. E ta un necesidad cu ta existi ya cu consumidor ta busca contratista pa tur sorto di trabou, segun e.
Sr. Maduro ta duna un ehempel di un caso cu tin di haber cu un contratista grandi cu a construi un dak como parti di su contract, caminda el a gaña cu otro sub-contratista lo haci e dak. Ta asina cu e mesun empleado di e compania grandi bisti cu T-shirt di e sub-contratista ey pa haci e trabou. E ta un caso cu ta refleha e falta di seriedad y iregularidad cu ta tumando luga riba tereno di construccion.
E ta informa cu e departamento aki kier cuminsa cu un programa di conscientisacion di contratistanan, ya cu nan kier traha mas e aña aki mas riba e tereno di construccion. “Nos ta haya basta keho cu tin di haber cu contratista.” Nan lo papia cu e contratista y splica nan kico ta nan obligacionnan, pero tambe nan derechonan. Nan lo papia riba e contract cu nan ta duna na nan clientenan y kico ta mara den ley. Segun Sr. Maduro, nan kier cuminsa cu e sector aki, ya cu nan ta hayando relativamente bastante caso contra contratista.
Garantia
“E caso contratista ta esun cu hopi biaha e balor di keho ta un tiki mas halto tambe.” E otro tipo di keho relaciona entre otro cu aparato electrico, ta un tiki mas abou cu e consumidor cu ta bin cerca nan, pasobra e contratista a traha ya sea un cura malo of no a drecha bon un dak cu ta lek. Of tambe ora cu e contratista no ta termina e cas manera debe ser. Tambe riba e garantia cu e consumido tin na e momento cu nan ta firma contract, pasobra hopi biaha e departamento aki ta mira cu e contratista no ta realisa cu unabes cu nan ta realisa e trabou, nan ta mara na basta aña di garantia cerca nan clientenan of consumidor.
Kehonan 2016
Pa departamento di Comision di Huur y Consumidor aña pasa 2016 a bay casi mescos cu e aña anterior 2015, den e sentido di cantidad di casonan cu a drenta cerca nan. Nan lo pone mas atencion riba e kehonan aki pa medio di nan departamento huridico. Ya cu pa medio di nan abogado nan lo traha un keho formalmente cerca e negoshi di producto of servicio pa medio di un carta.
Hopi biaha e carta ey cu e consumido ta supone cu ta traha, no tin e termino huridico importante. P’esey pa medio di e servicio huridico aki cu nan ta ofrece completamente gratis, nan hurista por traha e carta den nomber di e consumidor. “Hopi biaha e ta yuda pasobra e negoshi ta ripara cu e consumido ta tin’e den serio, y no ta haciendo wega y e ta dispuesto di bay mas leu”, Sr. Maduro ta bisa.
