Finalisando e siman aki, prome minister, Evelyn Wever-Croes a comparti loke el a yama un ‘bon noticia’ pa comunidad di Aruba. E noticia aki tin di haci cu e areglo di e negociacion cu Citgo cu ta yegando su final. Ya caba nan a firma e terminacion di e acuerdo y gobierno di su parti tambe tabata cla pa firme diahuebs anochi.
Esaki ta habri e opcion pa busca interesadonan pa huur infrastructura di e refineria awor cu ta existi un over produccion mundial di combustibel y no tin sitio pa almacena nan te ora cu e prijs di e crudo ta wordo stabilisa bek.
Segun e prome mandatario tin hopi interesado pa e huurmento di e tankinan. Gobierno ta bay haci lihe e proceso aki. Siguramente lo bin un periodo previo na cualkier acuerdo. Ya cu esun interesa lo kier inspecciona e tankinan prome cu e crudo yega.
E ta calcula cu den un termino di un luna pa un luna y mey, pues alrededor di juni venidero, Aruba lo por ta asina leu cu nos lo por huur e tankinan cu lo produci un entrada adicional di 4 pa 5 miyon florin pa luna por drenta pa caha di gobierno. “Si tur cos bay bon manera nos tin plania,” el a bisa.
Areglo di pago.
Cu e terminacion di e acuerdo aki e contract cu a wordo subscribi cu Citgo pa huur y opera nos refineria na San Nicolas a conoce un final. E mandatario a bisa cu Citgo ta bay paga su debe di 17 miyon dollar pa medio di un areglo di pago cu departamento di belasting a yega cu e compania aki.
E forma di pago di e debe aki lo ta como lo siguiente: 8 miyon lo wordo paga mesora den shete dia. E otro pago lo ta 1 miyon dollar un luna despues, y e 8 miyon dollar cu ta resta lo wordo paga na luna di october proximo.
Minister Presidente a declara cu e suma aki di 17 miyon dollar ta uno cu nan no a conta riba dje, pero sigur e ta yuda nos hopi bon den e crisis cu nos ta pasando aden pa causa di e Covid-19.
