ORANJESTAD – Un cantidad grandi di hende na Aruba diadomingo anochi a busca caminda pa wak e eclipse lunar, conoci como e ‘blood moon’, pa su color cora ‘sangriento’. For di tempran por a nota e interes pa medio di rednan social manera twitter y Facebook, anticipando e anochi. Despues gran cantidad di persona a mobilisa pa cierto partinan riba nos isla pa wak e fenomeno natural aki. E areanan mas frecuenta, tabata nos beachnan y algun lugar mas ‘halto’. Na tur, pa algun ora, gran cantidad di arubiano tabatin nan cara na laira, experienciando e ultimo eclipse lunar pa e periodo aki. E proximo ta te aki 33 aña.
DETAYES DI E SUPER LUNA
Hopi a puntra pakico e luna ta haya su color cora. Esaki ta pasobra durante e eclipse lunar, planeta tera ta move entre e solo y e luna, y ta corta e luz di e luna. Ora cu esaki sosode, e superficie di e luna ta haya un briyo color cora, enves di bira completamente scur. Banda di esaki, ta considera e luna di diadomingo anochi como un super luna, pasobra e ta e momento cu e luna ta mas serca den distancia, di planeta tera. Como tal un super full luna por mustra mas grandi y briya mas segun esnan riba tera. Un eclipse manera di diadomingo anochi ta hopi scars. Segun NASA, nan a sosode solamente 5 biaha durante siglo 20. Na aña 1910, 1928, 1946, 1964 y1982. Despues di ayera, e proximo eclipse lo ta te 8 di october 2033. Pues aki 18 aña. Cu rason, asina hopi hende kier a biba e experiencia aki ayera nochi. Y cu un shelo completamente liber di nubia, e experiencia aki tabata simplemente espectacular.
Picture credit : NBC News Pictures
News source: Noticiacla.com
