Nos ta yegando na e dia di entrega di lista y lo haya sa kico tabata rumor y kico ta berdad. Nos no ta bay dedica tempo na cada caso cu ta mustra interesante, di persona cu ta na punto di no bay riba lista, otro cu a keda rabia cu e posicion riba lista cu tin pensa di dun’e; otro ta evalua posibilidad pa haya puesto den parlamento. Si acaso nan partido bay den gobierno, e ‘top dogs’ ta bira ministro y henter e ‘segunda tanda’ di e partido ta haya oportunidad pa logra un bon salario pa por lo menos cuatro aña. Si lamentablemente, pa nan, e partido keda den oposicion no tin ningun posibilidad pa drenta, pasobra e A-team ta bay keda den parlamento. Esaki ta haci e competencia pa puesto asina candente, sigur den e partidonan grandi.

Pero banda di e deseonan di e diferente candidatonan, tin mas aspecto pa considera. Por ehemplo, con e candidatonan cu tabata mandatario o parlamentario anteriormente, a actua na fabor di e partido? Pa exitoso cu un partido por ta den gobernacion, nunca ta asina cu tur ministro ta laga un mesun record faborable atras despues di nan periodo. Den e actual coalicion esey ta parce e caso, unda no pornada un ministro ampliamente critica pa varios asunto, ta esun cu no tin un puesto halto sigura. Ta trata di e ministro encarga cu sector primario, transporte y pesca, cu tin varios issue no n su fabor. Durante y promer cu e crisistabatin plannan masha ambicioso pa expande sector di agricultura y horticultura sustancialmente, y realmente no por bisa cu tabatin gran avance den esey. Awor, bisa cu tur esey ta cay pa cuenta di e mandatario, tampoco ta berdad. Emision di tereno a keda stanca pa e turbulencia cu e ministerio di Infrastructura a pasa aden, tambe pa motibo cu henter e aparato di e departamento concerni (DIP) nunca tabata organisa pa actua cu velocidad, sino nunca nos tabatin e lista di espera di tanto miles pa tanto aña. Mientras tanto, cu un maneho firmemente den man di e partido grandi den e (ex-)coalicion, realmente no ta vislumbra mehoracion tampoco. Nos ta na altura di caso di varios empresa, entre otro den produccion di webo, cu a keda pega cu nan ambicionnan, pasobra nan no por keda cla cu e tereno necesario.

Banda di esey, nos a mira un proyecto di fast ferry cu a keda pega, supuestamente pasobra Corsou no tabatin cienmil florin pa pone riba mesa; ‘a otro perro con ese hueso’ nos mester bisa. Mas bien e proyecto tabata morto promer cu el a nace pasobra no tin perspectiva di e asina yama ‘critical mass’, e volumen di carga y pasahero pa haci esaki un proyecto viable. Algo cu e corant aki a señala desde inicio. Fuera di esey, tabatin e asunto di pakeer den centro di Playa, cu den casi cuatro aña no por a haya un solucion, ademas di e asunto di permiti piscamento cu harpun, cu ta pone nos na peligro di violacion di tratado internacional, y ademas ta un peligro grandi pa bida marino na nos costa. Ta inimaginable cu autoridadnan por ta tur caminda pa taha hende mata pisca proteha pa ley. Tambe, e ‘contribucion’ cu e mandatario a haci na practica di ‘friends & family’ nombrando coordinador y su ex den varios hunta di comisariodi empresanan estatal.

By the way, na e momento aki, cu e escandalo increible cu gobierno anterior a ocasiona den Refineria di Aruba, den cual nos ta kere cu mester bin un investigacion hudicial, te awe nos ta wardando pa haya prueba di un maneho diferente den e entidadnan estatal. Na un radioemisora un exponente di e partido grandi di e coalicion a papia recientemente atrobe di e ‘Good Governance Code’ pero te aweno a mustra ningun Code, suponiendo anto cu no a cambia nada ainda den nombramento di director y hunta di supervision a base di lazo amistoso o familiar, envez di crea credibilidad kibrando cu e practica aki.

Ta di spera cu despues di e locura di entrega di lista pasa, lo tin tempo pa dedica mas atencion na e asuntonan realmente importante pa nos. Ta obvio cu e acuerdo cu Hulanda ta laga poco espacio pa haci promesa, pa cualkier partido. Sin embargo, den e consulta cu Hulanda ta unda ta dicidi e detayenan y ta ey unda esun cu lo ta den gobierno por indica nan prioridadnan. Nos no ta tende tanto ainda di e detayenan. E decisionnan grandi den nos economia y gobernacionta pone nos riba un cruzada manera varios politico a vocifera. Pero tin un cruzada moral tambe cu mester hunga un papel den e eleccion aki. Mientras e partido grandi di coalicion ta carga desbentaha di goberna den e crisis y dituma e medidanan, mayoria di nan hustifica, e partido grandi den oposicion ta carga e peso di tanto caso hudicial grandi, unda pa promer biaha mandatarionan ta ser acusa di tabata dirigi un organisacion criminal. E problema no ta si e acusado ta bay riba lista si of no, su base di apoyo tradicional lo keda semper. E pregunta grandi ta con e ‘swing vote’ ta bay reacciona riba esaki. Riba lista si of no, e daño ta haci caba.