Den cuadro di Banco di Seguro Social (SVb) su 30 aña di existencia nan a bin cu e iniciativa di un competencia (tres categoria) cu ta envolvi hendenan di tur edad y no solamente pensionadonan.
Encarga cu Comunicacion y Promocion di Salud di SVb, sra. Cherryldine Buckley a declara cu nan a dicidi di envolve nos hobennan den e competencia aki, ya cu “hopi hoben no sa kico ta SVb”. Esaki ta e feedback cu nan a haya durante nan campaña di informacion di aña pasa cu a mustra cu nos hobennan no sa kico ta pensioen y pa kico nan mester di pensioen tampoco.
“Nan ta wak esey como algo cu e welo of wela ta cobra”, el a bisa. Pa tal motibo nan a pensa cu dor di nan actividad di hubileo nan por conscientisa nos hobennan. Di e forma aki fei di jong caba nan por mira importancia di e pensioen y “no ora cu bo ta haya cabey shinishi bo ta cobra pensioen”, manera ta e percepcion cu nos hobennan tin rond di pensioen.
P’esey tin un categoria di e competencia entre 10 pa 14 aña pa cuminsa conscientisa y motiva e hobennan riba asunto di pensioen.
Conscientisacion
E grupo entre 15 pa 18 aña cu ta cabando scol ya caba ta den e dilema si ta bay studia of traha. SVb tin informacion cu hopi hoben cu ta studia y traha part-time, no ta registra na SVb. El a aclaria cu cualkier persona sin excepcion cu ta traha mester ta registra na SVb.
P’esey SVb ta kere cu pa medio di e competencia di video nos hobennan por ta mas consciente di SVb su servicionan. Tambe pa nan compronde pa kico mester existi un banco di e caracteristica aki pa nan bienestar social.
E ta haya cu tin hopi hoben cu ta gusta traha video y nan tin conocemento di tecnica avansa riba e tereno aki. SVb ta bay kies cual di nan lo por brinda na nan un bon promocion of informacion cu ta mustra con SVb a crece durante añanan.
“SVb tin un compromiso social cu nos tin cu comunidad tambe”, el a declara. E tema di e video por ta varios, ya sea di nan servicionan, pero di cualkier otro tema specifico cu bo kier resalta. El a formula un invitacion na comunidad henter pa participa den e competencia aki. Nan lo percura pa instala un bon cuerpo di hurado pa evalua e miho produccion y asina saca e ganadonan.
