Directora di ELKA & Associates N.V., Abigaél Arends kende ta encarga cu e proyecto Autoestima Aruba a anuncia cu nan ta organisando un simposio riba derechonan di hende muhe. E ta un simposio cu pa su contenido y caracteristicanan ta prome biaha ta wordo realisa na Aruba.
Sra. Arends a declara cu nan a scoge 12 puntonan critico. “Esaki ta locual ta wordo discuti caba internacionalmente dor di gremionan mas grandi” relaciona cu derechonan di hende muhe., el a bisa. Encuanto e situacion local, el a laga sa cu base di su experiencia profesional y investigacion cu el a yega di realisa, nan a traha e contenido di e simposio aki. “Ta yega un punto cu bo kier haci un cambio”, el a laga sa.
Simposio
Sra. Arends ta atende varios cliente pa dia y e ta ripara cu e necesidad ta hopi grandi den nos comunidad pa informa y conscientisa riba e diferente area cu ta salvaguardia hende muhe su derechonan. Un aspecto cu nan lo atende tin di haber cu hende muhe den ambiente di trabou, caminda “hopi hende muhe den nos comunidad tin miedo pa papia”, el a bisa. Sra. Arends a agrega cu hopi hende muhe no sa kico ta nan derechonan. “Bin laga un hende muhe inspira bo…”, el a bisa.
E tema cu nan ta bay trata tin haber cu Muhe y Pobresa; Educacion teoretico y practico di hende muhe; hende muhe y salud; violencia contra hende muhe, hende muhe y conflicto cu arma, hende muhe y economia; hende muhe na poder y tumamento di decision; Mecanismo internacional pa adelanto di hende muhe, derechonan humano di hende muhe, muhe y media, hende muhe y ambiente laboral y e mucha muhe.
Nan ta e diferente areanan critico di hende muhe den nos comunidad cu nan ta bay trata di un forma profesional den e simposio aki. E simposio aki ta un iniciativa di sra. Arends hunto cu Mrs. Karin Bosman, kende ta un autor Hulandes y activista riba derecho di hende muhe na Hulanda. Igualmente diferente profesional y hende muhe trahando den diferente area y conoci den nos comunidad ta parti di e simposio aki como oradonan, entre nan: Ms. Abigael Arends, Dr. Nuris Lampe, Mrs. Karin Bosman, Mrs. Suzette Dumfries, Drs. Marisol Lopez-Tromp, Mrs. Evelyn Croes, y Sra. Trudy Hassell.
Nan ta seis hende muhe cu ta forma parti di e plataforma aki pa asina inspira, motiva y trece cambio den bida di hopi hende muhe local. Segun Sra. Abigael Arends, nan intencion ta pa yuda mas hopi hende den nos comunidad pa medio di nan historia y nan propio experiencia. E ta un forma pa hende muhe lo por educa su mes un tiki mas riba nan derechonan como ser humano. Pero tambe nan ta invita e hende homber pa participa den e simposio aki y bin scucha informacion pa apoya e ser femenino di nos comunidad.
E simposio lo tuma luga dialuna venidero fei di 6’or atardi pa 9’or anochi. Nan a kies un luga diferente, agradabel y nobo pa tal motibo e simposio aki lo wordo celebra na sede di MFA na Noord. E tin un costo aden pero nan kier pa tur hende bin y asina e contenido di e simposio aki por yega mas tanto hende posibel. “Nos kier pa tur hende lo por tin acceso na e informacion aki”, el a bisa. E prijs pa ticket ta uno accesibel pa tur hende . Esun interesa por yama na tel 588-4600 of na MFA na Noord riba dialuna awor.
