7jun, NW, spam (2).jpg

Hopi hende aki na Aruba ta cay den tentacion cu tur ‘spam’ cu tin riba medionan social. Hopi di e ‘spamnan’ aki ta bin di luganan manera Nigeria, Ivory Coast y Malaysia, incluso tin di nan ta bin di nos bisiña Venezuela.

 

E ‘spamnan’ aki ta pone hende kere pasobra esun cu ta haci esaki sa bon con e ta gaña no 1 persona pero hopi mas. Esun cu ta haci esaki ta gaña e persona cu hopi cos. Nan sa bon con pa haci esey y un di e maneranan mas facil pa haci esey ta ora cu nan tuma contacto cu un hende. Nan ta cuminsa na papia dushi, dushi cu e persona. Pero poco, poco nan ta cuminsa bisa cierto cosnan te ora cu nan ta pidi placa of ta bisa cu cierto producto ta bon. Un aviso di ‘spam’ si bo habri esaki, e por tin consecuencianan malo. E por ta un virus, pero pasobra hopi ta haci uzo di celular, esakinan por haya tur informacion eyriba.

 

Maneranan pa gaña

Un di e maneranan con e hendenan aki ta gaña ta ora cu nan bisa nan lo manda un pakete. Incluso nan ta bisa cu nan lo manda un cierto suma di placa, pero abo mester manda tanto placa pa nan prome. Asina cu nan haya esaki, nan mes no ta cumpli cu nan parti. Despues nan ta capaz di bolbe pidi pa manda nan placa pero nan ta bolbe duna un otro adres. Nan ta gaña hende cu nan lo casa cu nan, pero ta pidi pa manda tur informacion, pasashi y hopi mas. Pero na final esaki no ta e caso. E avisonan di ‘spam’ por ta un promocion, un remedi cu ta yuda baha peso, incluso ta bende cacho. Esunnan cu ta haci esaki ta percura pa tin diferente manera pa asina gaña hende sea pa placa of pa otro cos. Nan ta percura pa duna diferente adres, pa asina e luganan di placa no haya sa cu ta trata di e mesun persona pa asina avisa polis.

 

Cay den trampa na Aruba

Aki na Aruba hopi hende a cay den e trampa aki. Hopi a manda placa afo y a perde esaki. P’esey na luganan di manda placa, manera Western Union, a prohibi pa manda placa te cu awo pa Nigeria y Ivory Coast. Por ta na Western Union nan lo bisa cu nan no lo laga hende manda placa pa Malaysia. Hende lo no gusta pero nan ta haci esaki pa percusion ya cu hopi persona a perde hopi placa. Tin hende cu a hinca nan mes debe pa culpa di esunnan cu ta traha e ‘spamnan’ aki. Un meneer di edad grandi a perde te cu 10 mil florin pasobra el a manda placa pa e persona kende a gaña su persona bisando cu e lo casa cu su persona.

 

Bira consciente

Culpa di esunnan cu ta traha diferente sorto di ‘spam,’ otro tin cu sufri. Tur hende tin cu cuminsa puntra nan mes, ora cu e persona contact bo via twitter of facebook, e ta homber of muhe, e ta hoben of bieu. Dicon e ta bisa e ta di tal caminda, pero dicon e ta duna un otro adres. Riba medionan social tur hende mester ta cauteloso y puntra kico ta real y kico no. E ta manera productonan cu ta wordo pasa na television y hendenan kier purba nan, pero no sa precies kico ta e consecuencia. Hendenan mester cuminsa ta mas consciente riba medionan social, specialmente ora ta trata di avisonan of ora hende desconoci ta tuma contact.

Tur hende por cay den trampa di ‘spam.’ No ta importa e edad. Hopi ta bisa e ta grandi y e mester sa bon, pero un bon aviso di ‘spam’ ta gaña ken cu ta. Of hopi ta bisa cu e mucha ta hoben pero e mester sa bon pasobra e ta constantemente cu tecnologia. Pero esunnan cu ta percura pa traha e ‘spamnan,’ sa bon con pa gaña hende y awendia nos tur mester tene cuidou.