Hopi hende a sostene Feria Gastronomico Multicultural na Dakota

– Ayera a tuma luga e Feria Gastronomico Multicultural dilanti di Misa Birgen di Fatima na Dakota.

Sra. Olga Marin kende ta miembro di e comision cu a organisa e feria aki a declara na Bon Dia Aruba cu e feria a resulta un exito. El a gradici pueblo di Aruba en general y muy specialmente e parokianonan di Dakota cu a sostene e feria aki.

“Prome cos mi kier duna danki na Dios cu a scucha nos oracion pasobra tabatin menasa di yobida, pero Señor su tempo ta perfecto!”, el a bisa. E feria aki a cuminsa 9’or di mainta y a termina pa 2’or atardi. E tabata un mainta bunita yen di luz y splendor.

Sra. Marin a bisa cu e trabou cu nan a realisa pa medio di e feria aki ta pa recauda fondo pa renoba e misa aki. Te aworaki nan a yega di recauda e suma total di 1 miyon 73mil florin producto di diferente actividad cu nan ta bin realisando durante mas cu dos aña. Pero ainda falta 227 mil florin pa cuminsa cu e trabou grandi di renobacion di e misa aki. Nan ta kere cu durante e prome semester di 2017 nan lo cuminsa cu e trabou aki.

Ayera 7 pais a participa den e feria gastronomico: Aruba, Colombia, Venezuela, Ecuador, Republica Dominicana, Surinam y Peru. Nan a ofrece un variedad di cuminda tipico representativo di nan pais. No solamente cuminda sino cu nan a prepara bebidanan tipico tambe. Nan tabatin productonan entre 1 florin te cu 10 florin.

Tabatin paisnan cu prome cu 2’or atardi nan a bende tur nan cumindanan. E aña pasa a pasa mesun cos. Sra. Marin a laga sa cu no ta cuestion cu nan a traha tiki cuminda sino cu e hendenan a bin sostene masivamente e feria aki.