Segun directora di Fondo di Pensioen di Sector Turismo di Aruba (PFTSA), sra. Sanaa Baroud, e sector aki ta hopi amplio. No solamente e ta inclui e hotelnan, sector Horeca, sino cu nan tin companianan di auto, supermarket, operadornan di turismo, etc… Sinembargo e sector aki tin hopi compania cu no ta afilia ainda na e fondo di pensioen aki.
Nan kier bin mas agresivo riba e mercado pa capta mas miembro, y esaki ta un aspecto cu nan ta bay traha riba dje. Un di nan ta e gremio di taxista, y sra. Baroud a bisa cu den pasado nan a yega di tene combersacion cu e instancia concerni pa cu e taxistanan.
Pero el a laga sa cu e forma con ley ta hinca den otro actualmente ta prohibi e fondo di pensioen aki di tuma nan. Esaki no kiermen cu nan no ta cay den e sector turismo pero e setup con nan ta funciona cu nan propio permiso, ta haci cu e ley ta stroba pa e fondo di pensioen aki tuma nan.
Sra. Baroud a bisa cu gobierno ta atendiendo cu cierto cambionan, pero ainda nan no ta cla cu e parti ey. El a bisa cu como fondo di pensioen nan no tin problema pa ricibi mas miembro, pero nan mester respeta con e ley ta hinca actualmente.
El a splica cu segun nan statuto ta para cu nan mester organisa un biaha pa aña hunto cu su miembronan e tipo di asamblea aki un biaha unda nan ta presenta nan cifranan anual, maneho, vision y tambe e ehecutivo di e fondo ta haya oportunidad pa interactua cu nan miembronan pa nan sa kico ta nan deseonan pa wak si nan por introduci esaki den nan maneho di pensioen.
