Hopi cambio chikito… Cu no ta yega nunca…

Nos atencion – positivo – a cay riba anuncio di un parlamentario di e partido menor den e coalicion actual, bisando cu el a dirigi un carta na e mandatario encarga cu Labor, pidiendo atencion pa e asunto di salario minimo cu den e ley ta defini te awe como un pago minimo obligatorio pa luna o pa siman. Y mirando e posibilidad den nos legislacion laboral pa traha un siman di diferente ora (40 o 45, p.e.), ta resulta den un pago desigual – pa ora – pa un empleado cu ta traha mas ora pa siman. Nos ta kere cu e parlamentario a toca un bon punto aki, y ademas e solucion pa esaki ta bastante simple: introduci un salario minimo pa ora!

Mester bisa cu e tema no ta nobo, practicamente na cada cambio di e salario minimo tin algun comentario tocante e deseo o necesidad di introduci un salario minimo pa ora. Y te eynan e asunto ta yega…, te na e proximo oportunidad…, y ta ripiti. Segun nos opinion ta bira tempo pa kita e problema aki for di caminda; al fin y al cabo no por ta un trabao legislativo di otro mundo pa logra esaki. En corto, esaki ta requeri cambio den e ley corespondiente, e ordenanza encanto salario minimo.

Pero, si nos por a duna e impresion cu nos ley actual no conoce un salario pa ora, esey no ta completamente corecto. Den caso di e salario minimo pa personal cu ta traha den hogar di nan dunador di trabao, ta posible pa paga e salario minimo di Afl. 846,92 pa luna. Pero, si e persona ta traha menos cu 22 ora pa siman, su salario ta en todo caso por lo menos Afl. 9,45 pa ora. Asina anto, no por bisa cu introduci e salario pa ora den nos ley ta significa trece un elemento desconoci te awor. Ademas, di e manera aki ta bira mas facil pa calcula salario minimo pa tur empleado cu ta traha segun un orario diferente. Y den e tempo moderno aki, unda tin mas hende ta traha segun orario flexible, pa nan propio escogencia o pa obligacion, ta bira mas importante pa por tin maximo claridad tocante pago di salario.

Es mas, den e Landspakket cu a acorda cu Hulanda tin stipula accion di reforma riba tereno laboral, cu ta encera tambe actualizacion y modernizacion di e.o. “arbeidstijdverkorting, traha part time, contrato pa tempo defini,” etc. Tambe den e paquete aki ta papia di proposicion pa combati desempleo hubenil. Esaki no ta parce nos solamente algo util y urgente, pero por constata cu no ta haciendo uso di e posibilidadnan cu e ley actual ta brinda pa yega na areglo di un salario minimo pa hoben bao di 18 aña. Esaki ta importante pasobra en general un salario minimo mas abao pa hoben por funciona pa stimula nan caba nan scol promer y no bay traha cu 15, 16, 17 aña caba, sin termina nan educacion. Esey no ta contribui na e un nivel di educacion cu nos pais y nos economia mester, y a lo largo e no ta contribui na bienestar di e hoben tampoco, cu despues mester enfrenta bida cu un educacion no completo.

Mas cu un biaha caba nos ta tende voznan di preocupacion tocante e desempleo hubenil na nos pais, manera bisa anteriormente, e ta menciona como tal tambe den e Landspakket, pero nos no ta mira nunca un analisis di e problema aki for di tur angulo. Pasobra e solucion no ta simplemente pa percura pa trabao pa e hobennan aki. Pa bisa e cos aki na Papiamento simple: Ki mishi nos ta buscando empleo pa hobennan cu no a termina ningun educacion, cu por bien sigui pa un nivel mas halto? Nos por hinca nan awor aki den cualkier empleo paga na nivel mas abao, cu pago corespondiente, y despues? Nan no ta progresa, ni nos pais tampoco…

Awor, nos a menciona e posibilidad pa yega na un salario minimo mas abao pa hoben te 17 aña, riba esey mester paga e salario minimo completo, pero esey ta un medida explicitamente pa tene e hoben na scol, pa su mes bon y pa bon di comunidad. Ta logico cu esey no por ser logra nunca si no tin un plan completo cu ta abarca tur aspecto, tambe e requisitonan den educacion mes y e fondonan pa realiza esaki. Simplemente impone un salario mas abao pa hoben, sin un plan positivo completo pa nan educacion, lo no funciona nunca.

Pero, pa bolbe na e salario minimo pa adulto pa ora, esaki no ta parce nos un ehercicio asina dificil y ademas util. E ora anto, ta pakico nunca a yega na esaki? Esey ta parti di otro realidad cu mester bay cambia, si nos kier progresa como pais. E asunto aki ta un di e tantisimonan cambionan chikito, cu den e forma con legislacion ta opera, nunca lo yega na turno. No ta solamente falta di capacidad legislativo na e departamento di legislacion mes, pero falta di vision y uso adecua di e decenas di hurista cu ta traha tur caminda den gobernacion. Pero pa pone nan traha, ta necesario promer cu tur cos, cu na nivel ministerial tin un nocion di e cosnan aki, y cu ta nan prerogativo, y obligacion, pa informa nan mes y tuma accion. Esey ta bay sucede…?