Pa di tres dia consecutivo, compania di suministro di coriente, Elmar a confronta problema cu interupcion di produccion di coriente, afectando varios area riba nos isla.
Segun Elmar a post riba su pagina di Facebook, e areanan afecta ayera tardi tabata Palm Beach, Oranjestad, Sabana Blanco, Balashi, un parti di Savaneta y vecindario. Esaki despues cu un dia prome, debi na accidentenan di auto, a confronta un problema den e distribucion di coriente den area Seroe Patrishi, Morgenster y vecindario. Y un dia prome cu esey tabatin interupcion den distribucion di coriente den area di Oranjestad.
Sinembargo, tabata e blackout di ayera cu a afecta hopi mas area. Segun Elmar, tabata trata di un interupcion den produccion di coriente den planta di WEB. “Nos tecniconan ta keda ‘stand-by’ pa asina cu WEB soluciona e problema, cu nos por cuminsa suministra coriente den e areanan afecta. E areanan afecta ta Palm Beach, Oranjestad, Sabana Blanco, Balashi, un parti di Savaneta y vecindario”, Elmar a post riba su pagina di Facebook.
Pa 4pm, suministro di coriente tabata reestableci na tur area afecta, segun Elmar a infoma.
