Psicologo, Dimitri Halley

E fenomeno di termento no ta stop despues cu bo sali for di scol. Psicologo Dimitri Halley ta splica cu e ta consulta hopi adulto cu ta victima di termento y asalto na pia di trabao.

Manera cu nos a informa anteriormente, Telefon pa Hubentud ta preparando pa introduci un protocol di termento na 31 scol na Aruba. Esaki segun nan, ta un proyecto necesario den nos comunidad en cuanto ta problematica di termento. Den un entrevista aña pasa cu Bon Dia Aruba, director di Telefon pa Hubentud a remarca cu e problematica di termento ta uno hopi mas profundo di loke mayoria di nos ta kere.

Termento no ta solamente pasa na scolnan y den hogarnan cu muchanan y hobennan. A base di mas cu 20 aña di experiencia y trabao diario como psicologo, sr. Halley ta confirma cu:”E ‘bully’ y victima riba e schoolplein bo ta hay’e bek den e organisacion (na trabou).” E ta enfatisa cu na pia di trabao  bo ta haya inhusticia y termento di hende locual el a conclui cu ta pasa den cada relacion: sea doño di trabao cu empleado, mayornan cu yiunan y parehanan. “Esaki ta un problematica cu ta afecta tur area den nos sociedad anto ami ta wak e constantemente. Door cu nunca nos ta atende suficientemente bon cu e cosnan aki por ehempel na scol, pero tambe prome cu scol – pues e abuso di/of rond e mucha na cas – e ta keda bin pa dilanti structuralmente.”

Adiccion
Un di e puntonan importante pa remarca den esaki segun sr. Halley ta cu e comportacion aki ta un forma di adiccion sea na abuso of sufrimento. No ta asina cu bo por interveni den un sistema manera esaki y cambi’e. “Sociedadnan por ta den un Stockholm Syndrome den liderazgo. Unda cu bo ta bisa cu bo no tin suficiente briyo of curashi pa sali for di e rol di e victima of esun cu mester keda carga e sufrimento.” Pa bo atende suficientemente bon cu e problema aki, bo no mester djis deal cu e bully, segun e psicologo.  Esaki ta un punto cu tambe ta inclui den e proyecto nobo di Telefon pa Hubentud.

Origen y base di nos sociedad
Algo cu a bin dilanti den entrevista aña pasa cu Telefon pa Hubentud, tabata e hecho cu esunnan cu ta tenta otro ta pasobra nan mes ta wordo tenta na cas, club deportivo of otro caminda. E mucha ta cuminsa tenta y uza esaki manera un forma di defensa emocional. Psicologicamente, sr. Halley ta confirma e tipo di comportacion aki den adultonan cu ta abusa of tenta otro na pia di trabao. “Esaki ta bay bek atrobe den e prome experiencianan como mucha. Famianan kibra, muchanan cu ta lanta practicamente sin cuido, cariño y guia. E ta bay bek na e base di un sociedad. Si bo ta papiando di un sociedad cu tin mas cu 80% di divorcio, bo ta papiando aki di un sistema unda e famia kibra ta e norma.” E cuido pa trata cu e tipo di comportacion aki ta bayendo practicamente a base di remedi. E tipo di comportacion aki na pia di trabao hopi biaha tambe ta keda bon tapa of scondi.  “Den organisacionnan nos no tin un sistema por ehempel ora cu un hende ta victima di un hefe. Unda e empleado tin cu bay? Bo tin e departamento di Human Resources cu ta traha mas pa e gerencia cu pa e empleadonan. E ta hopi dificil pa atende cu e cos aki den organisacionnan mes si e maneho mes ta ocupa cu termento”, sr. Halley su opinion ta.