Ciennan di hende a subi caya diahuebs atardi pa marcha contra criminalidad unda cu na final, gobierno a cera compromiso y priminti pa cumpli cu tres punto como accion inmediato riba exigencianan di manifestantenan.
Segun calculacion di polis, pa 6or di atardi tabata tin entre 700 pa 1000 persona cu a participa den e marcha cu a cuminsa na Postkantoor y termina na Bestuurskantoor sin ningun problema.
Hopi hende a reclama cu prensa no mester pone atencion riba e cantidad di hende referiendo na algo cu Betico Croes a bisa un tempo cu ”si un solo persona so protesta, bo mester scuch’e!” Ta asina cu un cantidad di hende a subi caya pa protesta riba varios diferente tema unda cu por a hasta mira e caso di baby Lunah bin dilanti.
Bon Dia Aruba tambe a topa algun famianan di casonan di e tiramento fatal na Wayaca como tambe mayornan di victima di caso di ‘Yellow’ cu tabata riba caya ta manifestando. E manifestacion a sali 4 or y mey y 2 ora despues e masa tabata dilanti Bestuurskantoor unda cu a topa cu prome minister Mike Eman, minister di Husticia Arthur Dowers y su coleganan minister Benny Sevinger y Paul Croes. Sr. Eman a ricibi e manifiesto, bisando cu gobierno tambe ta comparti e preocupacionnan den comunidad y ta haci maximo esfuerso pa combati nan. Pero cu ta importante cu nos ta keda uni den esaki.
Despues e ministernan hunto cu e comision cu a organisa e marcha a drenta Bestuurskantoor bek pa delibera riba e puntonan. Hopi hende e ora a dicidi di bay. Mas o menos un mey ora despues comerciante Hubert Dirks di e organisacion, a sali pafo y declara cu e manifestacion tabata un exito. ”Tur tres punto a wordo firma y lo wordo ehecuta”, e ta bisa. Despues cu esaki a wordo menciona, varios hende a grita cu nan ta spera gobierno cumpli cu esaki mas lihe cu ta posibel anto cu e no bira un otro promesa falso.
Compromiso
E tres puntonan cu gobierno a firma pa cuminsa pone den accion de inmediato tabata:
1. Pa declara siguridad como prioridad y zero tolerancia contra criminalidad y ilegalidad.
2. Pa gobierno compromete su mes pa aumenta presupuesto 2017 pa combati criminalidad cu 10 miyon adicional.
3.Reforsa cuerpo policial pa comunidad conta cu mas polis riba caya
‘Si Dowers no por, mamacita t’ey’
E famia den e caso di tiramento di Shasha Fong na Wayaca algun siman atras, no kier a duna un declaracion na Bon Dia Aruba. E famia di e victima den e caso di tiramento na Olde Molen na december 2015, esta e caso di e conoci Yellow cu a caba di haya 18 aña di castigo, tambe a presenta na e marcha y ta bisa Bon Dia Aruba cu nan no por a keda afo. ”Nos no ta contento cu locual ta pasando na Aruba en cuanto criminalidad. Si Dowers no por, e ora bis’e cu mamacita t’ey!” e familiar ta bisa.
Lisette Gomes tambe a presenta cu su fundacion pa marcha contra abuso di mucha. Sra. Gomes ta bisa cu criminalidad contra nos muchanan ta e crimen di mas teribel cu por existi. ”Bo ta caba cu bida di un mucha y comunidad henter pa motibo cu ora muchanan aki crece y bira grandi, nan no ta bay funciona manera debe ser den nos comunidad.” E ta agrega cu e ta hopi contento di a mira hende subi riba caya y bin apoya e varios punto di preocupacion cu tin den nos pueblo.
Mas preocupacion riba atraco
Bon Dia Aruba a puntra varios ciudadano cua tabata nan preocupacion di mas grandi en cuanto criminalidad na Aruba. Mayoria ta bisa ta e serie di atraconan cu ta pasando actualmente. ”Asina cu un auto pita dilanti di cas, mi mama ta cera e cas completo y keda paden. Asina hopi miedo e tin pasobra henter ora tin atraco den noticia.” Varios hende tabata tin diferente borchi cu nan a uza pa expresa nan mal contento y hopi di esakinan tabata dirigi na politiconan cu diferente pintura di diseño.
No tin color politico
Diego de Cuba, lider di sindicato STA, ta splica Bon Dia Aruba cu e gritonan di hende cu ta bisa cu e marcha aki tin politica su tras semper ta bin di e partido den gobernacion. ”Esey ta di lamenta unda nan tin hende cu ta hasta yuda nan cu e gritonan ey. Pasobra esaki no ta un asunto di MEP, PDR, AVP of ningun partido. Nos pais ta pasando den un temporada di crisis pa cu criminalidad. Tur esunnan cu a mustra nan presencia pa cu e manifestacion aki, ta haci e pasobra nan ta hopi preocupa cu e situacion.”
Lider di fraccion PDR Andin Bikker cu tambe tabata presente ta bisa cu den pasado tabata tin algun marcha cu si a wordo lansa pa partido politico di cual sindicatonan a bay apoya sin bisa nada. Bon Dia Aruba a puntra sr. Bikker kico ta su opinion tocante sindicato FTA cu a dicidi di no apoya e marcha pa motibonan politico, di cual el a contesta: ”Mi ta respeta nan decision pero ta tur hende ta wordo afecta door di criminalidad. Criminalidad no tin distincion, pues mi no ta di acuerdo.”
