Alrededor di 2.2 miyon persona diasabra a mira e transmision mustrando e yegada di Sinterklaas na Hulanda, e inicio di tres siman di festividad na caminda na e evento principal di duna regalo dia 5 di december proximo.
E cantidad di espectador ta alrededor di mey miyon mas cu aña pasa. E aña aki, a cancela paradanan tradicional pa motibo di coronavirus, y canal publico Hulandes, NTR a desaroya un storia special di Covid pa splica e situacion na muchanan chikito.
Varios ciudad y pueblo a tene eventonan online. E falta di eventonan publico a silencia e debate fuerte tocante Zwarte Piet, e ayudante tradicional di Sinterklaas cu antes tabata representa pa un persona blanco den ‘blackface’. Sinembargo, durante ultimo añanan opinion a cambia y awo ta mas probable cu lo representa Piet cu un cara sushi, pa representa baha den chimenea (schoorsteen) pa entrega regalo, particularmente den e ciudadnan Hulandes mas grandi.
Investigacion publica siman pasa ta mustra cu sosten pa e Zwarte Piet tradicional cu ‘blackface’ ta sigui disminui y awo por conta cu sosten di solamente 55% di poblacion Hulandes. Aña pasa, 71% di e 29mil persona encuesta pa un panel di EenVandaag a bisa cu nan ta sostene e version blackface di e ayudante di Sinterklaas.
AD tambe a reporta siman pasa cu algun biblioteca a cuminsa elimina bukinan mustrando Piet tradicional for di nan rekinan. E movida ta ‘logico’ y ‘apropia’ pa tempo actual, segun hefe di biblioteca Hulandes, Anton Kok a bisa e corant.
Mientras tanto, parlamentario- y otro campañadonan a critica sostenedonan di e Zwarte Piet tradicional pa presenta na e cas di un activista anti-blackface prominente diasabra ultimo. Bisiñanan a bisa e activistanan pa bandona e luga despues cu nan a para pafo di e porta di entrada di rapper Akwasi na Weesp.
