Ayera mainta durante un sesion publico, presidente di Hoofstembureau di Aruba, Rossi Marchena a anuncia cu tur lista di candidato politico cu a ser entrega a keda valida y 11 partido ta cla pa participa den eleccion parlamentario dia 6 di december venidero.

Manera ta conoci, dia 18 di october ultimo Hoofdstembureau di Aruba a ricibi 13 lista di candidato politico pa eleccion parlamentario dia 6 di december 2024. Ocho di e listanan cu a ser entrega mester a haya sosten di firma di votadornan. Cada un di e ocho partido aki tabatin mester di 586 firma di votador, cual ta1% di votadornan valido di e ultimo eleccion na 2021.

Marchena a splica cu e motibo cu e ocho partido aki mester a haya sosten di 586 firma di votador ta pasobra nan no a logra saca un asiento den Parlamento di Aruba durante e ultimo eleccion di parlamento na aña 2021, of pasobra e partido no a participa na esaki. E sosten den forma di firma por a tuma luga for di 21 di october te cu 29 di october 2026.

Manera ya caba ta conoci, seis di e ocho partido a logra ricibi sosten di 586 votador, cual ta partidonan CURPA, FUTURO, HTC, LPR, PPA y RED. Dos partido no a logra ricibi sosten di 586 votador cu nan tabatin mester y ta trata di lista di partidonan MIA y UPP.

Marchena a sigui splica cu dia 1 di november ultimo Hoofdstembureau a tene un sesion pa controla tur e listanan cu a ser entrega 18 di october y riba 4 di november tur partido cu a entrega nan lista a ser informa di loke mester a ser coregi riba nan respectivo lista di candidato pa eleccion di dia 6 di december.

El a indica cu e partidonan politico tabatin oportunidad pa haci coreccion for di 5 di november te cu 7 di november. E siguiente partidonan a haci e coreccionnan necesario riba nan respectivo lista di candidato: ACCION21, AVP, CUPRA, FUTURO, LPR, MAS, MEP, HTC, PPA, RAIZ y RED.

Marchena a anuncia oficialmente, despues di e proceduranan necesario, Hoofdstembureau di Aruba ta valida e 11 lista di candidato di partidonan politico menciona y ta mantene tambe e candidatonan riba e respectivo listanan pa eleccion di 6 di december 2024.

E listanan valida ta como lo siguiente partido: ACCION 21 cu nuebe candidato riba lista; partido AVP tin 29 candidato riba su lista; partido CUPRA cu shete riba su lista; partido FUTURO tin dies candidato riba su lista; partido LPR tin shete candidato riba su lista; partido MAS tin shete candidato riba su lista; partido MEP tin 29 candidato riba su lista; partido HTC tin cuater candidato riba su lista; partido PPA tin 16 candidato riba su lista; partido RAIZ tin 11 candidato riba su lista; y por ultimo partido RED tin 10 candidato riba su lista.

Marchena a informa cu pa motibo cu e lista di candidato di partidonan MIA y UPP no a logra haya e sosten necesario di 586 votador, e dos lista aki ta ser declara invalido y consecuentemente e dos partido aki no lo ta participando den eleccion parlamentario dia 6 di december.

El a splica cu contra e decision pa valida of no valida y mantene candidato riba listanan politico, e partidonan tin dos dia pa apela. Si niun partido no apela, e ora Hoofdstembureau di Aruba lo tene otro sesion publico dia 13 di november pa numera y asigna color na e lista di candidatonan di partidonan politico. E numeracion y asignacion di color lo sucede pa medio di trekmento di lot.

Esakinan tambe ta e manera cu e partidonan lo aparece riba e stembiljetnan na momento cu ciudadanonan bay eherce nan derecho di voto dia 6 di december venidero.

Un di e listanan di candidatonan cu a hala atencion ta entre otro e lista di partido AVP. Te cu 18 di october mainta, lider di partido Mike Eman tabata candidato number uno riba lista y e hoben Wendrick Cicilia tabata candidato number shete. Despues cu ambos a subi pa haci entrega oficial di e lista di candidato, den declaracionnan na prensa Mike Eman a anuncia cu e partido tin un candidato nobo riba puesto number uno, esta Wendrick Cicilia y Eman a bay te na ultimo posicion, number 29.

Otro partido cu tambe a hala atencion cu su lista ta partido nobo FUTURO. Manera ta conoci for di basta tempo caba rumornan tabata circula cu candidato y minister demisionario di RAIZ, Geoffrey Wever, lo bandona RAIZ pa subi lista di e partido nobo. E rumornan aki inicialmente a ser desmenti pa partido RAIZ.

Pero e rumornan a resulta di ta berdad y partido RAIZ a traves di un comunidad oficial riba nan pagina di Facebook a anuncia dia 8 di october cu Geoffrey Wever ta bandona e partido sin specifica cual partido Wever lo uni.

Algun dia despues lider di partido FUTURO, Gerlien Croes a anuncia cu Wever ta subi lista di e partido como candidato y lider.

Partido RAIZ di su banda tambe a hala atencion mirando cu e politico Kinsasha Thielman-van der Bliek a subi lista di e partido. Thielman-van der Bliek tabata miembro di partido RED Democratico y na comienso di october a anuncia cu el a tuma decision di bandona partido RED pa motibo cu e no ta resona mas cu e tipo di liderazgo cu ta eherciendo den e partido.

Partido HTC tambe tabatin atencion di comunidad, specificamente durante e periodo di colecta di firma. Lider di e partido Gilbert Webb tabata un topico di combersacion riba rednan social pa su perseverancia y determinacion durante e siman cu partidonan tabatin pa colecta 586 firma di votador pa por participa den eleccion.

Hopi a aplaudi Webb pa no give up y keda riba pia for di mainta te anochi na e localidad caminda votadornan por a pasa pa firma pa sostene e partido. Pa hopi esaki tabata e factor cu a hiba nan na contribui y firma pa e partido por confirma su participacion den eleccion parlamentario dia 6 di december.