Un grupo pro-democracia di legisladonan na Hong Kong a entrega un reto legal contra e uzo di un ley di emergencia di era colonial pa criminalisa e uzo di mascarada durante protesta, pa asina controla demostracionnan anti-gobierno, cual a disminui den intensidad, pero no a stop.

E prohibicion di bisti mascarada a drenta den efecto pa mey anochi diabierna, pa combati un racha di violencia y destruccion amplio den e teritorio semi- autonomo Chines, incluyendo candela y atake riba un oficial di Polis.

Activistanan ta luchando den Corte contra e prohibicion, cual ta haci dificil pa Polis identifica e manifestantenan radical. Legislado Dennis Kwok a bisa cu un grupo di 24 legislado a entrega un apelacion legal pa blokia e ley anti-mascarada pa motibo constitucional. El a bisa cu lider di e pais, Carrie Lam, a actua di mala fe door di evadi e Conseho Legislativo, parlamento di Hong Kong, pa invoca e ley di emergencia.

Lam a bisa cu e lo busca sosten di e conseho pa e ley ora su sesion reanuda dia 16 di october, y no a descarta mas medida si violencia continua.

E ceramento di red MTR di metro y trein, cu normalmente ta maneha 4.000.000 biahe pa dia, a causa interupcion importante di ciudad, cu general nunca ta descansa pero awo ta paralisa pa 7.500.000 di persona. Tambe aeropuerto internacional di Hong Kong e a cera pa un momento su servicio.

Den un discurso riba television, Lam a describi Hong Kong como semi-paralisa y a bisa cu tur ta preocupa, ansha y spanta.

“Gobierno mester tuma medida drastico rechasa violencia, restaura paz den sociedad y proteha e derecho di ciudadanonan pa sigui nan bida y nan libertad, sin laga un grupo chikito destrui esaki”, el a bisa.

Algun tabata di acuerdo, pero otro ta culpa Lam pa provoca e movemento di protesta cu un medida bandona cu lo a permiti sospechoso criminal wordo extradita, pa ta husga dilanti tribunal controla pa partido comunista, na China continental.

“Manifestantenan kier democracia y libertad, pero nan no tin libertad awo? Hende por bay unda cu nan kier y tin libertad. Libertad tin mas balor cu democracia. Mi ta spera cu hende hoben no haci algo cu nan lo repenti pa semper”, Peter Tai ta bisa, kende ta un doño di tienda.

Sinembargo, hopi manifestantenan pacifico ta bisa cu violencia a bira un forma pa yega na e meta, e unico manera pa e manifestantenan jong cu mascarada forsa e gobierno pa acepta nan exigencia di democracia y otronan.