(AP)—Hong Kong a duna bon bini na e nacemento di su prome pandanan gigante naci localmente ayera, cu nan mama birando e mama nobo mas bieu na mundo den e tipo di record aki, segun e parke cu ta cria nan a anuncia.
Ying Ying, e mama, a duna luz na e twinnan—un homber y un embra—na Ocean Park solamente un dia prome cu e mes a cumpli 19 aña, e parke a bisa den un declaracion. E y su partner Le Le ta e segunda par di panda duna pa China desde e ex-colonia Britanico a regresa bao gobernacion Chines na 1997.
Pandanan ta considera como e mascota nacional no oficial di e pais y e programa di prestamo di panda gigante for di China cu zoonan den exterior ta conoci pa basta tempo como un herment di e diplomacia di Beijing.
Ocean Park a bisa den un declaracion cu pandanan gigante “ta pasa duro pa por reproduci, specialmente mientras nan ta bira mas bieu” y embaraso di panda no ta detectable inmediatamente.
Aunke Ying Ying a cuminsa mustra sintomanan incluyendo un perdida den apetit, un aumento den necesidad pa descansa y cambionan den nivelnan hormonal na fin di juli, a confirma su embaraso apenas diadomingo pasa. Diaranson su ekipo di cuido a ripara e sintomanan di parto y su likido amniotico kibrando anochi. Despues di cinco ora di parto, e dos baby panda a nace ayera mainta, e parke a bisa.
“Ambos baby ta actualmente hopi fragil y mester tempo pa stabilisa, specialmente e baby femenino cu tin temperatura abao, yoranan zwak y menos apetit despues di nacemento,” e parke a bisa. Bishitantenan lo mester warda un par luna pa nan debut publico.
Presidente di Ocean Park Corp. Paulo Pong a gradici e ekipo di cuido local, como tambe expertonan for di China pa nan partnersip y asistencia durante e ultimo añanan. “E nacemento ta algo unico, specialmente considerando cu Ying Ying ta e panda gigante mas bieu riba record pa a duna luz exitosamente pa prome biaha,” Pong a bisa.
Lider na Hong Kong John Lee tambe a expresa su gratitud na e gobierno central pa e regalo di e pandanan na e centro financiero na 2007, bisando cu el a mustra e cuido di Beijing y apoyo pa e ciudad.
Hong Kong tin su mesun sistema hudicial y di gobernacion y China a implementa un ley di seguridad nacional na 2020 cu a ser usa pa persigui activistanan pro-democracia. Na juli, Lee a anuncia cu Hong Kong lo ricibi un tercer par di panda for di China. E par aki ta anticipa pa e aña aki.
E prome par difunto, An An y Jia Jia, a yega na 1999. Jia Jia, ken a muri cu 38 aña na 2016, ta e panda mas bieu na mundo cu a biba den captividad. E duracion di bida en averahe pa un panda den salvahe ta 18 pa 20 aña, mientras den captividad e ta 30 aña, segun e Guinness World Records.
