Congreso di Honduras a aproba recientemente un articulo nobo di e Codigo Penal cu ta castiga como ‘terorismo’ e promotornan di manifestacion di protesta, te cu 20 aña di prizon, asina diputadonan di oposicion a denuncia.
E aprobacion di e articulo 590 di e Codigo Penal di parti di Congreso, ta ‘un retroceso di e libertadnan publico’, e diputado di e partido Libertad y Refundación, Rasel Tomé, a declara na prensa.
“No por tipifica como delito di terorismo un mobilisacion na defensa di e pueblonan indigena, di derechonan laboral, politico y ambiental, ta p’esey nos a vota contra,” el a añadi.
E diputado di Partido Innovación y Unidad (Pinu, socialdemocrata), Doris Gutiérrez, a adverti cu hasta un protesta pa aumento di prijs di canasta basico por ser considera terorismo. E legislado a splica cu e articulo ta laga na discrecion di e hues pa tipifica como “terorismo” cualkier mobilisacion.
E polemico articulo 590 di e Codigo Penal ta establece cu “ta asociacion terorista esnan constitui, sea di modo permanente o transitorio, pa dos o mas persona, pa comete algun delito” cu meta manera “subverti gravemente e orden constitucional, altera gravemente paz publico o provoca un estado di teror den poblacion o parti di esaki.”
“E dirigente, promotor y financistanan di e asociacion mester ser castiga cu e pena di prison di 15 pa 20 aña,” e articulo ta detaya.
Na augustus pasa e diputadonan a aproba un articulo di e Codigo Penal, bahando di nuebe pa seis aña di prizon e delitonan di corupcion y e proposicion original tabata di diesdos pa nuebe aña, loke a provoca critica di oposicion.
Tambe na april di e aña aki a aproba un articulo cu ta castiga cu cuatro pa ocho aña di prison e medio di comunicacion o persona cu haci loke ta yama ‘apologia na terorismo’ loke a motiva gremionan di periodista pa presenta recurso den Corte Supremo di Husticia, cu ainda a keda sin decision final.
