Trahadonan den sector salud y educacion a enfrenta dialuna pasa cu polisnan na Tegucigalpa, durante un manifestacion pa protesta contra reforma di e gobierno.

Lider di maestro y trahadonan di sector salud a anuncia cu lo yega e centro di e capital pa manifesta di forma pacifico. Sinembargo, dos ora prome, gruponan chikito a intenta di yega sede di Parlamento, loke a causa un bataya campal den cual e polisnan a lansa gas lacrimogeno y a uza cañon di awa pa contene e personanan cu tabata defende cu piedranan.

Mientras cu na otro ciudad di interior, docentenan a kima tirenan y a atravesa palo na e caretera pa blokia acceso. Tambe a paralisa na gran medida e labor di scolnan y hospital.

E protestanan a cuminsa siman pasa contra un Ley di Restructuracion y Transformacion di e Sistema Nacional di Salud y Educacion, cu a ser aproba pa Parlamento.

Nan a señala cu e ley aproba ta orienta pa privatisa educacion y salud, y cu lo bin retiro masivo di maestro y personal di medicina; algo cu autoridad di ambos banda, incluyendo minister di Presidencia, Ebal Diaz, a sigura ayera cu no ta berdad.

Na e manifestacion di maestronan y di e sector salud a uni studiante di educacion medio y universitario, como tambe partido di oposicion.

Jair Meza, vocero di Polis di Honduras, a bisa periodistanan cu ‘personanan infiltra’ den e protestanan di maestro a causa ‘caos, desordo, y daño pa bien publico y priva’.

El a agrega cu e Polis ta mantene ‘semper na alerta y pendiente di loke ta pasa’ na e manifestacion, cu awe den su mayoria tabata pacifico.