Supremo di Honduras ayera diabierna a duna orden pa ripiti huicio contra ex-prome dama Hondureño, Rosa Elena Bonilla, casa di ex-presidente Porfirio Lobo (2010-2014), den contesta pa dos recurso presenta pa e defensa di e acusado, un fuente oficial a informa.
Portavos di Corte Supremo di Husticia, Carlos Silva, a bisa pa periodistanan cu Sala Penal a declara na su luga e dos recurso pa violacion di forma presenta pa e defensa di Rosa Elena Bonilla, ken 28 di februari di 2018 a ser captura na su cas, na Tegucigalpa y manda pa prizon, y dia 4 di september di 2019 a ser condena pa 58 aña di prizon.
Segun loke Silva a expresa, te awor no a bisa si e ripiticion di e huicio ta supone cu e casa di e ex-presidente lo keda den libertad.
Sala Penal, pa unanimidad di voto, a admiti e recurso di e defensa y a manda “Tribunal di Sentencia cu competencia nacional den materia di corupcion pa haci e huicio nobo contra e señora Rosa Elena Bonilla Avila, ken ta supone di ta responsabel como co-autor di e delito di apropiacion no debido y autor di ocho delito di fraude na concurso real”, Silva a indica.
Ademas di e condena di 58 aña di prizon, di e cual segun e ley no por cumpli mas di 30, Bonilla a haya un multa di 1,2 miyon lempira (48.387 dollar), ekivalente pa 10% di mas di 12 miyon di lempira (495.967 dollar) cu segun a desvia di e fondonan di e Despacho di Prome Dama, pa cuentanan di banco personal di dje.
Ayera e ex-presidente Lobo a bisa pa un canal di television local cu e ta satisfecho di e resolucion pa cu lo ripiti e huicio, cu otro huesnan, contra su casa, cu e cual el a sigura cu ta inocente di loke ta acusa.
