(EFE) – E ola di violencia contra hende muhe na Honduras, na unda mas di 170 di nan a muri di manera violento e aña aki, ta mantene den alerta organisacionnan feminista, cu diamars ultimo a pidi cu urgencia na autoridadnan accionnan pa mehora e capacidad di contesta.
“Cada morto violento di hende muhe cu ta sucede na e pais ta bati alarma pa e organisacionnan feminista y tambe mester pone den alerta e institucionnan, cu nan trabao ta protege y garantisa e dignidad y bida di hende muhenan”, Nessa Medina, activista di organisacion Somos Muchas a bisa.
Un total di 177 muhe a muri di forma violento na Honduras entre januari y juli di e aña aki, segun datonan di ONG Centro di Derechos de Mujeres (CDM).
Medina a destaca cu na Honduras, “tin boluntad politico” pa elimina violencia di genero despues cu e presidente Hondureño Xiomara Castro, a anuncia e integracion posibel di e pais aki na Protocol Facultativo di Convencion riba Eliminacion di Tur Forma di Discriminacion contra Hende Muhe”.
Un mayor control di armanan di candela, promove casnan di refugio y accionnan preventivo, ta bay contribui pa reduci e mortonan violento di hende muhe na Honduras, el a señala.
54.8% (97) di e muhenan a fayece na causa di heridanan di arma di candela cu a wordo emplea pa nan agresor, e mayoria tabata personanan no conoci, segun cifranan di CDM.
A agrega cu 39.5% di e victimanan tabatin entre 20 y 39 aña, 18.1% tabata menor di 19 aña.
Nuebe di cada dies morto violento di hende muhe ta keda impune na Honduras, ya cu “no sa kico a pasa, ken a mata nan, pero nan si sa di e dolor cu tur famia ta sufri”, e activista di e colectivo cu ta defende derecho di dicidi y lucha contra criminalisacion di aborto na e pais, a señala.
Honduras a comprometi su mes na maart ultimo di preveni y pone fin na violencia contra hende muhe y muchanan muhe na a pais, den un documento firma na Tegucigalpa pa e presidente Castro y coordinador residente di Nacionnan Uni, Alice Shackelford.
