Bon Dia a sinta combersa un rato cu presidente di Alfa Sr. Maikel Kelly riba e historia, bida y morto di su esposo Gerard Heemskerk kende tabata un persona cu semper tabata encurasha Arubianonan cu ta homosexual pa para pa nan derecho.
Sr. Heemskerk tabata di bay cumpli 66 aña otro luna y segun Sr. Kelly ta splica Bon Dia e tabata malo caba pa algun luna y e no tabata comiendo bon. Diamars ultimo den marduga ora cu Sr. Kelly a yega cas el a haya Gerard tira den e stoel sin energia. El a wordo transporta pa hospital caminda cu el a wordo interna di biaha y pa diaranson su situacion tabata birando pio te cu el a cuminsa haya atake epileptico. Tur su organonan a stop di traha pa motibo di un infeccion hopi pisa mes y e causa di morto tabata problema cu su higra. ”El a wanta su forsa te na ultimo y esey ta bisa tambe loke e ta como persona.” Sr. Kelly ta bisa.
A cuminsa Jimmy’s Place como un aventura
Jimmy’s Place a habri alrededor di 13 aña pasa y segun Sr. Kelly el a cuminsa como un aventura. ”Nos a bin biba na Aruba, tira poco fiesta na cas y algun conoci a bisa nos cu Jimmy’s Place tabata na benta y dicon nos no ta tuma esaki over y cuminsa cu un bar. Nos a drenta e luga y nos a dicidi cu nos lo tuma e luga, e tabata un parti hopi lihe mes y nos a tuma e decision pa haci algo cu ne. Jimmy’s Place tabata conoci caba como un luga pa tur sorto di hende y nos ta papiando di casi 25 aña atras, sinembargo despues cu nos manera dos hende homber a tuma e luga over el a cuminsa wordo yama un luga pa homosexualnan. E ora nos a bisa ya, nos a cambia e concepto y mantene nomber Jimmy’s Place pasobra nos tabata gusta e nomber manera cu e ta. Nos tabata un di e prome clientenan di e prome propietario Jimmy Douglas y semper nos a gusta e luga, nos conoce for di hopi tempo mes y nos a cumpra e luga pasobra semper Gerard tabata tin e idea pa crea un luga pa celebra bida y diversidad”. Sr. Kelly ta splica Bon Dia cu poco lagrima den wowo.
Sea bo mes, y durf di sea bo mes
Gerard Heemskerk a habri e negoshi aki y su curason pa henter e comunidad LGBT di Aruba pasobra despues cu e cu Sr. Kelly a bini Aruba casa caba, nan a spanta di con hopi e comunidad aki ta wordo oprimi y cu hopi cos mester a cambia. Gerard Heemskerk tabata un persona cu semper tabata encurasha otronan pa no tene miedo di ser nan mes. ”E ta un di e prome pioneronan di Alfa, el a dal su man riba mesa na cas y bisa cu tin cu cuminsa awor sino e no ta bay pasa nunca mas. El a bisa si e tin cu paga e ta haci e, nos tin nos statuutnan, ”bay Notario y firma e cos pa caba pa nos tin un nomber” e tabata bisa nos. Semper esey tabata su lucha y nunca e por a compronde dicon tin tanto diferencia di opinion den nos comunidad no solamente den e comunidad LGBT sino den general tambe, diferencia di rasa , nacionnan y cosnan asina.”
Ta bay sigui cu e lucha pa derecho igual
Gerard Heemskerk tabata hopi contento cu e movecion di e amienda y tabata bisa cu porfin a cuminsa move riba esaki despues di tanto aña di lucha. ”Nunca el a spera cu iglesia lo bay reacciona asina negativo cu asina hopi odio. Su palabra tabata ta cu el a kere cu nos ta memey di e lucha pero door di e amienda nos lo cuminsa cu e lucha.” Sr. Kelly ta splica. Gerard Heemskerk tabata hopi activo den e comision di Alfa anto semper e tabata duna inspiracion na kico mester a haci y si cosnan no tabata bayendo den bon caminda, asina mes e tabata purba pusha y bisa ”no worry si awe nos no a logra mañan ta otro dia anto nos ta bay logra.”
.jpg "Awe conmemoracion victimanan Orlando na Jimmy’s Place")
