Como 17 bus a resulta kima pa hombernan arma, durante diaranson anochi y diahuebs marduga na diferente punto di ciudad di Fortaleza, capital di estado Ceara, autoridad a informa.
E atake mas reciente a tuma lugar ayera diahuebs marduga na bario Vila Velha, caminda bombero a logra paga e candela y no a laga ningun hende herida, autoridad di Brasil a raporta.
Otro 16 autobus di transporte publico a ser kima diaranson anochi na bario conoci como Edson Queirzo, Barroso do Ceara y na municipio Horizonte na region di Fortaleza. E chauffeur di un di e autobusnan a sufri kemadura, cu no ta pone su bida den riesgo pero si mester a hib’e hospital di ciudad Fortaleza. E atake a ser realisa pa hombernan arma, cu a obliga tur pasahero pa baha for di bus y despues a cende na candela y el a kima totalmente.
E sindicato di empresa di transporte di pasahero di estado di Ceara a dicidi di no saca tur bus di circulacion y cuminsa un huelga como protesta pa e atakenan cu nan a sufri. Secretaria publico di estado hunto cu polis civil y militar, warda municipal di Fortaleza, empresa di transporte urbano di Fortaleza y sindicato di transporte ta traha na diferente punto di capital di Fortaleza, pa asina garantisa nan servicio.
Polis ta investiga motibo di e atakenan y a informa cu 6 persona a keda deteni bao sospecho di participa den e incendionan registra.
