Dos hacker di computer a wordo acusa di desfigura websitenan na Merca den retaliacion contra e asesinato di general Irani, Qassem Soleimani, segun fiscal federal a bisa ayera.
E hombernan, kende autoridadnan ta kere ta bibando na Iran y teritorionan Palestino, ta acusa di hack websitenan Mericano y reemplasa nan contenido cu potret di e general top Irani, y mensahenan manera ‘Down with America’, oficialnan a skirbi den documentonan entrega den corte federal di Massachusetts.
Behzad Mohammadzadeh, kende ta kere tin alrededor di 19 aña di edad, y Marwan Abusrour, kende autoridadnan ta kere tin alrededor di 25, a gaba online di nan accionnan, segun fiscal.
Mohammadzadeh publicamente a bisa di a plama mensahenan pro-Iran y pro-hacker riba mas di 1,100 website rond mundo desde 2018, segun fiscalnan, mientras Abusrour a gaba di desfigura sikiera 337, segun oficialnan a bisa.
“E hackernan a victimisa terceronan inocente den un campaña di represalia pa e accion militar cu a mata Soleimani, e homber tras di cantidad di actonan di teror contra Mericanonan y otronan cu regimen Irani tabata opone”, segun John Demers, assistent di Procurador General pa seguridad nacional a bisa den un declaracion. “Nan accionnan kiboca, ilegal den sosten di un regimen desestabilisador lo bin back contra nan, ya cu awo nan ta fugitivo di husticia.”
Merca a mata Soleimani den un atake aereo na aeropuerto internacional di Baghdad na januari, pasobra segun oficialnan di Defensa, e tabata ‘activamente desaroyando plannan pa ataca diplomaticonan Mericano y miembronan di servicio na Irak y den e region’.
E hombernan ta acusa cu un cargo di conspira pa comete daño intencional na un computer protegi, y un cargo di intencionalmente daña un computer protegi. FBI a revela poster di fugitivo cu nan potret y apodo online – Mrwn007 y Mrb3hz4d – urgiendo publico pa tuma contacto cu e autoridadnan mas cercano si tin informacion riba nan.
“Awo, FBI ta buscando nan y nan no tin libertad mas pa biaha pafo di Iran y of Palestina sin riesgo di aresto”, segun agente di FBI na Boston, Joseph Bonavolonta. “Acusacion di awe mester manda un mensahe poderoso cu nos no lo duda di bay contra cualkier persona cu comete intrucionnan cibernetico malicioso contra Mericanonan inocente pa causa caos, miedo y daño economico”, el a bisa.
