Plastic keto bay ta keda contamina nos medio ambiente na nivelnan alarmante. Pa e motibo aki, gruponan manera Lonely Whale, Last Plastic Straw, y Straw Free a lanta. Ademas, hopi alternativa pa straw di plastic a wordo introduci, manera metal of di aros. Pero awo, tambe a converti yerba den straw.
E innovacion di un homber di Vietnam yama Tran Minh Tien, a mustra con un cierto tipo di yerba, yama Lepironia articulata y cu ta wordo haya rond di e Mekong Delta, ta converti den straw (pijp).
E strawnan aki no ta contene ningun kimico ni preservativo. Mas importante, nan ta biodegradabel. Den un video riba Facebook, Tran Minh Tien, doño di Ong Hut Co., ta splica e proceso con pa traha yerba den strawnan.
Prome, nan ta colecta e ‘taki’ di yerba, cual ta wordo laba y despues corta na largura di 20cm. Despues nan ta wordo laba di paden uzando un metal. Despues di wordo laba un biaha mas, e strawnan ta wordo mara hunto den un blachi di banana. Ingenioso!
E strawnan ta bin den dos version: fresco, y seco. Esunnan fresco por wordo warda den frigidaire pa dos siman, of den un camber fresco pa un siman. Mientras tanto, esunnan seco ta wordo laga bou solo entre 2-3 dia, despues hinca den un forno. Esakinan por wanta mas largo, te hasta seis luna den un camber fresco.
E strawnan aki por wordo uza un biaha so den restaurant, y re-uza varios biaha na cas. Un straw seco ta costa 4.3 cent mientras un fresco ta costa 2.6 cent.
E video riba Facebook a ser mira mas di 2.1 miyon biahay a wordo comparti mas di 35,000 biaha.
E compania tambe a splica con pa uza e strawnan riba nan website. Prome cu uz’e, mester muhe den sea awa, soapnut, awa cu salo, of hasta awa herbi. Nan tambe ta pidi pa despues cu e straw wordo uza, e wordo hinca den un bin di compost.
E strawnan aki, cu tin un holo natural, por wordo cumpra na Vietnam so actualmente.
