E amor di un trahado di construccion na Massachusetts pa drop a termina costando su bida. Come un saco y mey cada dia pa algun siman a desahusta su nutrientenan, causando cu e curason di e homber, di 54 aña di edad, a stop, segun dokternan a reporta ayera.

“Hasta un cantidad chikito di drop cu bo come por aumenta bo presion di sanger un tiki”, segun Dr. Neel Butala, cardiologo na Hospital General di Massachusetts, kende a describi e caso na e New England Journal of Medicine.

E problema ta acido glycyrrhizico, haya den drop preto y hopi otro cuminda y suplementonan dietetico cu ta contene extracto di raiz di drop (licorice). Esaki por causa nivel di potasio peligrosamente abao, y desbalansa otro mineralnan yama electrolyte.

Come apenas 2Oz di drop preto pa dia pa dos siman por causa un problema di ritmo cardiaco, specialmente pa persona riba 40 aña di edad, segun FDA ta adverti.

“Ta mas cu djis e sticknan di drop. Por ta jelly beans, te, hopi cos. Hasta algun cerbes, manera cerbes Belga, tin e componente aki”, como tambe algun tabaco pa kauw, segun Dr. Robert Eckel, cardiologo di Universidad di Colorado y ex- presidente di Asociacion di Curason na Merca. E no tabata involucra den e caso di e homber na Massachusetts.

E morto claramente tabata un caso extremo. E homber a cambia di twists cora, sabor di fruta, pa e version drop preto di e mangel algun siman prome cu su morto. El a collapse mientras e tabata come lunch na un restaurant fast-food. Dokternan a haya cu e tabatin un nivel peligrosamente abao di potasio, cual a conduci na problema den ritmo di curason, entre otro. Personal di emergencia a haci CPR y el a rebiba, pero a fayece e dia siguiente.

FDA ta permiti pa contenido di un cuminda tin acido glycyrrhizico hasta 3.1%, pero hopi mangel y otro productonan no ta revela cuanto ta contene pa cada ons, Butala a bisa. Dokternan a reporta e caso na FDA cu speransa pa pone atencion riba e riesgo.

Jeff Beckman, vocero pa compania Hershey cu ta fabrica e Twizzlers di drop, a bisa den un email cu ‘tur nos productonan ta safe pa come y formula den cumplimento completo cu regulacionnan di FDA’, y cu tur cuminda, incluyendo mangel, ‘mester wordo disfruta den moderacion’.