Un serie di caso di difamacion di perfil halto a wordo lanta en contra di un hende muhe, como contesta na e lansamento di acusacion di mal conducta sexual entre e movemento #MeToo, y activistanan di derecho di hende muhe ta bisa cu esaki por tin un efecto negativo riba e futuro di e movemento.

Sandra Muller, periodista Frances, a aparece den corte pa cargo di difamacion contra Eric Brion, productor di television, a haci su contra, pa motibo cu Muller acusa e homber di haci comentario vulgar sin decencia tocante su persona.

Su storia a inspira miles pa tambe comparti nan experiencia di acoso sexual of abuso. Den un disculpa publico den e diario Frances, Le Monde, na december 2017, Brion a admiti di a haci e comentarionan en cuestion, bisando cu el a haci ‘comentario inapropia’ na dje, ‘hopi laat anochi, burachi durante un fiesta, pero mi a haci’e un biaha so’.

Den corte, Brion a bolbe admiti, bisando cu a manda un disculpa, pero no a ricibi un contesta. “E violencia di Muller contra mi nunca a stop”, Brion a bisa. E ta prefera di drecha asunto den corte di husticia na luga di ‘corte di medio social’.

El a demanda Muller pa defamacion, y ta pidiendo 50.000 di libra ($64,000) pa daño y 10.000 libra ($13,000) na gasto legal. Su abogado, Maria Burguburu a bisa cu ta acusa di difamacion pasobra Muller a acusa Brion di ‘acoso sexual na trabou’ riba Twitter.

Muller, kende a wordo nombra como persona di aña pa kibra silencio, a bisa cu e ta sorprendi pa strategia di Brion. “E movemento a inspira victima pa bin dilanti, y tambe a ilumina un problema social real, cu ainda ta un taboo. Esaki ta un manera pa pone mi cera mi boca. Mi lo lucha te final.”, el a bisa.

Demandando Muller pa difamacion, Brion ta uni un lista creciente di homber rico den posicion poderoso, kende a tuma accion legal contra nan acusadonan.

Actor Geoffrey Rush a gana su caso contra e corant Australiano, Daily Telegraph, cual a reporta cu el a acosa su co-strea Eryn Jean Norvill, algo cu Norvill mes a revela. Yael Stone, kende tambe a acusa Rush di acoso sexual, a bisa cu e leynan di difamacion a dun’e miedo di bin dilanti. Rush ta nenga ambos acusacion.