Un homber arma cu un cuchiu, gritando ‘mi lo mata bo’, a ataca un grupo di mucha muhe cerca di un bus di scol pafo di Tokyo. E homber a mata dos persona, heridando 17 persona, y despues el a mata su mes.
Mayoria di victima tabata alumno di un scol catolico ‘Caritas Gakuen’, cu tabata wardando pa subi nan bus, ora cu e homber a yega cu cuchiu. Polis a logra captura e homber, pero el a muri ora el a yega hospital pasobra el a corta su mesun nek.
Segun testigo a bisa, cu mucha y adulto tabata riba suela, algun yena cu sanger, muchanan tabata core y grita pa yudansa. “Mi a tende un grito y mi a stop pa wak kico ta pasa. Mi a wak un hende a cay, despues otro. E color blanco di nan camisa a bira a cora, e ora ey mi a compronde cu nan a wordo hinca”, Yasuko Atsukata a bisa.
Polis a identifica e atacado, Ryuichi Iwasaki, di 51 aña di edad, residente di Kawasaki. Ainda no ta conoci a e motibo di e atake, y lo check su trabou. Tambe a identifica e fatalidadnan, un mucha muhe di 11 aña, Hanoko Kuribayashi, y Satoshi Oyama, di 39 aña di edad, trahado di gobierno cu tabata hibando su yiu na e bus.
Segun oficial di scol lo pone mas siguridad. “Mucha chikito tabata victima, mi lo tuma tur medida necesario pa proteccion y siguridad di e muchanan”, prome ministro, Shinzo Abe a bisa.
E pais ta conoci pa un cantidad baho di crimen compara cu resto di mundo, pero ora tin matamento, e ta causa daño grandi. Na 2016, un trahado di un cas di persona cu discapacidad a mata 19 y herida 20 persona.
