Un homber Ruso a ser deteni na aeropuerto di Bali (Indonesia) pa motibo di tabata tin un macaco den su maleta. Tambe e tabata tin den su posesion 5 lagadishi y 2 gekko. Tur e bestianan tabata na bida na momento di detencion.
Segun e homber a declara na autoridad Indones, el a haya e macaco (orang-oetang) di un amigo, kende a cumpra esaki pa mas o menos 3000 dollar. Segun e Ruso, e amigo a bise cu e lo por biaha pa Rusia cu e macaco sin ningun problema, unda e lo uza e bestia como un mascota di cas. Pa por a transporta e bestia, e homber a uza un tipo di anestesia.
Sinembargo awo e homber Ruso por haya un castigo di te cu 5 aña den prizon ya cu orang-oetang ta un bestia protegi na Indonesia.
Potret ta cortesia di Reuters.
