Ex propietario na Rancho El Paso, Rubert Ceferino Boye, 73, naci na Aruba,  a regresa e isla ayera despues di a keda desampara na Republica Dominicana pa algun aña.

Familiarnan a logra di haya sa via di Facebook cu e homber a keda riba caya anto a cuminsa un esfuerso pa trece bek despues di 18 aña cu e tabata biba na Republica Dominicana.

Dos luna pasa un persona yama Shirley Croes a post riba su Facebook un apelacion na comunidad di Aruba pa yuda un Rubiano cu aparentemente lo ta riba caya na Republica Dominicana.  E cabayero aki a inverti su placa den un finca di cabay di rasa hunto cu un socio na Santo Domingo segun e famia.  E negoshi tabata uno lucrativo te hasta nan tabata trece cabay na Aruba tambe.  E storia cu e famia a haya for di esunnan cu tabata yuda Boye na Santo Domingo, ta cu aparentemente e socio a fayece dos aña pasa anto e casa di e socio a bende tur pertenencianan di e homber. El a coy e paspoort y bende tur cabay anto tira Rubert Ruru Boye riba caya. E tabata pasando den un situacion hopi penoso na Republica Dominicana. Un famia den cercania a cuminsa yud’e cu cuminda. Un di nan a cuminsa haci esfuerso pa yuda haya su familiarnan na Aruba. Tur cos a cuminsa prome cu e post di sra. Croes riba Facebook y for di eynan esaki a yega te na e sobrina di Ruru.

Sin documentacion
Na prome instante e tabata mustra dificil pa por regresa Ruru bek pa Aruba. E no tabata pues tin un paspoort pa por identifica su mes na embahada di Santo Domingo, cual el a perde pa basta tempo. Cu yudansa di e famia, un proceso largo, a logra transporta documentonan unda por a identifica Ruru. Un otro desafio tabata pa Ruru bay te na e embahada di Santo Domingo desde San Cristobal, un distancia leu for di otro sin placa pa transportacion. E famia a logra conhuntamente cu yudansa di hopi hende pa te hasta busca paña nobo pa Ruru pa ora e yega e embahada.  Tur cos a resulta positivo na final segun e famia cu yudansa di hendenan manera sra. Croes y varios otro cu a reacciona via Facebook, Reinier Davina cu coleganan di embahada Hulandes na Santo Domingo y Edwin Abath.