(TheJerusalemPost)—Despues di dos aña di tratamento, e prome humano pa ta infecta cu e mata di beskem mortal “Chondrostereum purpureum,” a recupera completamente.
Su caso a wordo detaya den un estudio publica den un publicacion yama “Medical Mycology Case Reports” na maart 2023. E homber (61) di Kolkata, India, a bay hospital cu sintoma di voz kibra, tosamento, dolor di garganta, cansancio, dificultad cu gulimento y anorexia, cual e tabatin tres luna ta experenciando. Mayoria biaha, esnan cu ta contrae infeccionnan di beskem no comun tin condicionnan existente cu ta baha e capacidadnan di nan sistema immuun, manera diabetes, HIV of cualkier malesa cu ta rekeri medicamento immunosupresante.
Pero e homber aki tabata saludabel. El a contrae e infeccion den su trabao como un micologo di planta trahando cu material organico cu ta dañando, por ehempel hongo y varios mata di beskem, segun e estudio.
Chondrostereum purpureum ta causa un malesa di beskem yama “Silver Leaf,” cual sa ataca especienan di e famia rosa, e rapport a splica. E malesa ta progresivo y mayoria bes, fatal. E malesa ta plama via aire—spoor ta wordo plama via biento di mata pa mata.
Dr. Shuchin Bajaj—doño y director di e red di hospital Ujala Cygnus na India—a conta The Indian Express cu exposicion pa tera contamina, material di palo of mata tambe por aumenta e riesgo di infeccion pa humano: “E beskem por drenta e curpa via un corta, un herida of via rosea,” el a bisa.
E estudio ta splica cu aunke miyones di especie di beskem ta existi rond di nos, solamente un par shen so por infecta humano y animal.
“Cu malesanan di animal y humano por wordo causa pa un patogeno di planta ta un concepto nobo cu ta causa preguntanan serio tocante e tendencia pa un infeccion asina sosode den hendenan saludabel y cu sistema di immuun afecta,” e investigadonan a conclui.
