Mediante un comunicado di prensa, Ministerio Publico (OM) a informa cu ayera a detene un homber di inicial K. Esaki relaciona cu un investigacion andando riba delitonan sexual.
Durante e registro den cas di K. na Papilon a confisca cargadornan di informacion, como tambe seis arma di candela y un cantidad considerable di municion, segun OM a informa.
Ministerio Publico a informa den su comunicado tambe cu lo no duna mas detaye na e momento aki pa garantisa e integridad di e investigacion.
Sinembargo, informacion circulando den medionan di comunicacion local, a identifica e detenido como un ambtenaar, kende durante Gabinete Wever-Croes I y II a traha como chauffeur pa un mandatario. Tambe a indica cu e sospechoso ta pertenece na un club di tiramento, y cu esey por ta e motibo pakico tabatin un cantidad di arma den su posesion. OM no a confirma directamente e informacion aki.
