Un hues federal a condena un homber di nacionalidad Chines di spionahe economico, horta secretonan di industria, y participa den conspiracion na beneficio di gobierno di su pais.
Hues Mericano, Edward Davila a haya Hao Zhang di 41 aña di edad culpabel di tres cargo diabierna despues di un huicio di cuatro dia. E decision ta yega cinco dia despues cu a acusa Zhang bou cargo di conspiracion pa horta tecnologia di dos compania poco despues di gradua di Universidad di Southern California. E secretonan di industria a ser horta di ex- luga di trabou di Zhang, Skyworks Solutions na Woburn, Massachusetts, y Avago Technologies na San Jose, California, compania cu despues a wordo adkiri pa e fabricante di chip, Broadcom.
E tecnologia horta ta usa pa yuda filtra señalnan no desea pa smartphone.
E condena ta parti di esfuersonan pa combati e supuesto robo di China di tecnologia cu patente crea na Merca, un problema den fondo di e guera comercial entre e dos paisnan den añanan recien. Gobierno Chines consistentemente a rechasa e acusacion di ta envolvi den ningun esfuerso pa horta tecnologia Mericano.
E veredicto ‘ta un stap importante pa tene responsabel un individuo cu a horta su doño di trabou Mericano di secretonan di industria y a busca di replica tecnologia di e compania y reemplasa su parti di mercado”, segun John Demers, procurador general assistent di Departamento di Husticia pa siguridad nacional.
Abogado di Zhang, Daniel Olmos, a nenga di duna comentario riba e veredico. Zhang ta enfrentando un sentencia maximo di 10-15 aña di prison y multa di hasta $250mil pa cada un di e tres conviccion. Sentencia ta programa pa dia 31 di augustus proximo.
