Un homber Australiano a declara culpabilidad diahuebs na fraude di seguridad pa motibo di a estafa inversionistanan pa mas di $90 miyon door di gasta placa cu nan a pone den su fondo di cryptomoneda, segun fiscal a bisa.
Stefan He Qin, di 24 aña di edad, a duna su declaracion di inocencia pa un cargo di fraude na corte federal na Manhattan. Autoridadnan ta bisa cu e fraude a tuma luga entre 2017 y 2020 mientras Qin a opera e fondo titula Virgil Sigma.
“Stefan He Qin a basha casi tur bienes di e $90 miyon den e fondo di criptomoneda di cual e tabata doño, hortando placa di inversionistanan, gastando esaki riba indulgencia y inversionnan speculativo personal, y gañando inversionistanan tocante e prestacion di e fondo y riba kico el a haci cu nan placa”, abogado Mericano, Audrey Strauss a bisa den un comunicado.
El a bisa cu despues Qin a purba horta placa di otro fondo cu e tabata controla pa cumpli cu e demanda di rescate di e inversionistanan defrauda den e fondo anterior. “Henter e cas di carta a keda revela, y Qin awo ta wardando sentencia pa su hortamento”, Strauss a bisa.
Fiscalnan a bisa cu Qin a estafa decenas di inversionista, incluyendo hopi na Merca.
Nan a bisa cu e fraude a keda revela berano ultimo, tempo cu Qin tabatin dificultad pa cumpli cu solicitud di rescate di inversionistanan. Qin ta enfrenta 20 aña den prison den un sentencia dia 20 di mei proximo.
Sean Hecker y Shawn Crowley, abogadonan di Qin, a bisa den un declaracion cu nan cliente ‘a acepta responsabilidad completo pa su accionnan y ta comprometi pa haci loke e por pa haci amienda’.
