(AP) — Un residente di Utah, acusa di haci menasa contra presidente Joe Biden, a ser tira mata pa agentenan di FBI algun ora prome cu e presidente tabata spera pa yega e estado ayera, segun autoridadnan a bisa.
Agentenan special tabata purbando di cumpli un orden na cas di Craig Deleeuw Robertson na Provo, sur di Salt Lake City, na momento cu e tiramento a tuma lugar pa 6:15am, segun FBI a bisa den un declaracion.
Robertson a post online dialuna cu el a scucha cu Biden tabata biniendo Utah y cu e tabatin plan pa saca un trahe di camuflahe y “kita e stof for di un rifle sniper m24”, segun documentonan di corte. Den otro post, Robertson ta referi na su mes como un “MAGA Trumper,” un referencia na ex-presidente Donald Trump su slogan, “Make America Great Again.”
E post a indica cu e si tabata parce di tin un rifle sniper di largo alcance y cantidad di otro arma, como tambe ekipo di camuflahe conoci como “ghillie suit,” segun investigadornan a bisa den documentonan den corte. A acusa Robertson bao seyo diamars cu tres cargo di delito, incluyendo haci menasa contra e presidente, segun documentonan di corte ta mustra.
Robertson tambe a haci referencia na un “asesinato presidencial” y a haci otro menasa contra fiscal di Manhattan, Alvin Bragg, Procurador General Merrick Garland, y fiscal di New York, Letitia James.
“Tempo ta bon pa un asesinato presidencial of dos. Prome Joe despues Kamala!!!” autoridadnan ta bisa cu Robertson a skirbi den un post riba Facebook na 2022, inclui den e documentonan di corte. No a lista ningun abogado pa Robertson den documentonan di corte inmediatamente.
Tampoco a revela mas detaye di e tiramento inmediatamente, cual ta bao revision di FBI.
