(AP) – Un homber cu a ser acusa di mata rapper Pop Smoke na 2020 durante un robo na un mansion den Hollywood Hills a acepta un acuerdo di culpabilidad, evitando un huicio relaciona cu un cargo di asesinato cu lo a cuminsa diahuebs.
Corey Walker, 24, a acepta su culpabilidad diaranson pa asesinato boluntario y dos cargo di robo den un acuerdo pa un sentencia di 29 aña den prison.
E tabata e unico adulto cu a ser acusa den e caso, cu tres otro cu tabatin edad hubenil na e momento di e crimen, incluyendo un tirador cu tabatin 15 aña. Tur cu ya a yega na un acuerdo apart.
Walker a ser acusa di dirigi e grupo na e mansion, unda e rapper di New York, Pop Smoke, kende su nomber legal ta Bashar Barakah Jackson, a ser mata na 19 di februari 2020, durante un biahe di cuatro dia na Los Angeles. Un yamada pa 911 di un amigo di un persona den e cas a raporta un intruso arma den e cas, segun polis.
E ladronnan tabatin e adres, pasobra un dia prome, Pop Smoke a post un potret na red social di un regalo cu e la haya, y e adres tabata ariba e etiket, segun autoridadnan.
E rapper tabata den baño ora e ladronnan cu mascara a enfrent’e. Durante un lucha, e hoben di 15 aña, cu un pistol, a dal e un golpi na su cabes y a tir’e tres biaha den su lomba, segun testimonio di corte.
E atacante a horta su holoshi di diamanta di Rolex y a bend’e pa $2,000, segun testimonio di un detective.
Naci na Brooklyn, Pop Smoke a yega na e escena di hip-hop na 2018 y bira famoso cu su cantica “Welcome to the Party,” un himno tocante asesinato y droga cu a bira un sensacion grandi, y a pone cu Nicki Minaj a canta un verso den un remix.
