(AP) – Un ex lider di gang ta pidiendo pa anula tur cargo den su contra relaciona cu e asesinato di Tupac Shakur den 1990.
Abogado Carl Arnold a entrega e mocion dialuna na Corte di Districto na Nevada pa retira e cargonan contra Duane Davis den e asesinato di Shakur na 1996. E mocion ta acusa cu tin violacionnan constitucional serio a causa di un atraso di 27 aña den persecucion. E mocion tambe ta papia di un falta di evidencia y honor na acuerdonan di inmunidad otorga na Davis pa autoridadnan local y federal.
“E persecucion no a hustifica un atras di decadas cu a causa prehuicio contra mi cliente,” Arnold a bisa den un comunicado di prensa. “Ademas, e falta di honor na acuerdonan di inmunidad ta kita e balor di e sistema di husticia criminal su integridad y ta cuestiona seriamente e persecucion aki.”
Clark County District Attorney Steve Wlfson no a responde inmediatamente na un email pidiendo comentario tocante e mocion. El a bisa cu evidencia contra Davis ta fuerte y lo keda den man di hurado dicidi e credibilidad id Davis su version di e storia tocante e tiroteo, incluyendo esnan expresa den un memoir di 2019.
Davis originalmente ta di Compton, California. El a keda deteni den e caso den september di 2023 cerca di Las Vegas. El a declara su mes inocente na asesinato di prome grado y a pidi liberacion poco despues di su detencion.
Davis ta acusa di a plania y facilita e tiroteo cu a causa e fayecimento di Shakur y a herida e magnate musical Marion “Suge” Knight despues di un pelea na casino di Las Vegas Strip involucrando Shakur y Davis su sobrino, Orlando “Baby Lane” Anderson.
Autoridadnan a bisa cu e tiro a surgi for di un competencia entre miembronan di East Coast di e secta di gang Bloods y e gruponan West Coast di e gang Crips, incluyendo Davis, pa un posicion dominante den e genero conoci na e tempo aki como “gangsta rap.”
Den entrevista y un memoir di 2019 cu a describi su bida como lider di un secta di e gang Crips na Compton, Davis a bisa cu el a obtene un arma di .40 y a entrega esaki na Anderson patras den e vehiculo for di cual e y autoridadnan ta bisa el a los tiro contra Shakur y Knight cu tabata den otro auto. Davis no a identifica Anderson como e persona cu a los tiro.
Shakur a fayece e siman despues na un hospital cercano. E tabatin 25 aña di edad, mientras cu Knight a sobrevivi y ta cumpliendo un sentencia di 28 aña en conexion cu e asesinato di un homber di Compton na 2015.
Anderson a nenga hunga un rol den Shakur su morto y a fayece den 1998 cu 23 aña den un tiroteo na Compton. E otro dos homber den e vehiculo tambe a fayece.
