Durante investigacion tocante e morto di Bas van Wijk, polis a haya e holoshi y un arma di candela a traves di e instruccionnan di un di e sospechosonan, segun Ministerio Publico (OM) a anuncia diahuebs.
“A ser realisa pruebanan di e tiro pa por determina si e arma di candela tabata esun utilisa [den e asesinato]. E sospechoso cu a duna pistanan na polis ta esun cu a duna un declaracion di confesion siman pasa” OM a bisa. E abogado di un di e sospechosonan a confirma na NU.nl cu su cliente a haci un declaracion di confesion. Ta trata di un residente di Amsterdam di 20 aña di edad. E abogado Schwartz no kier duna mas detaye tocante e caso.
Por lo tanto, e abogado no por contesta e preguntanan tocante e relacion di e homber cu e otro sospechosonan y si ta trata di famia, por ehempel. Ministerio Publico ta informa NU.nl cu no tin e mesun fam cu e sospechosonan, Schwartz no kier bisa si su cliente tabata den contacto anteriormente cu polis, of kico a causa e incidente di e tiramento. “Ta cuestionnan di fondo” e abogado a bisa, ken ta sigura di conoce su cliente desde 5 aña caba.
E robo di e holoshi lo por ta e causa. Van Wijk di 24 aña, a ricibi un tiro dia 8 di augustus na momento cu posiblemente e tabata intenta di interveni den e robo di holoshi di un di su amigonan. E tabata den e parke De Oeverlanden den Amsterdam den e caluroso dia di berano.
Polis a bisa riba diahuebs cu e conseho y declaracionnan di e testigonan a pone velocidad den e caso. Danki na e declaracionnan den combinacion cu e investigacion tactico, 5 sospechoso a wordo deteni siman pasa y un di nan a confesa di ta esun cu a tira. Otro a resulta di no tin nada di haci cu e tiramento, pero a wordo deteni pa otro delitonan. OM ta informa NU.nl cu ta trata di un violacion di ley di arma.
