Holo y smaak straño di producto alimentacion Chines ta keda un misterio

Den un entrevista cu Yvette Geerman di Departamento Di Salubridad Publico, el a splica Bon Dia cu ta hopi dificil pa bin na un conclusion concreto na kico por ta  causando e holornan straño cu cierto supermercado Chines ta produci. Esaki tambe ta conduci na smaak straño di cuminda cu nan ta bende.

”Actualmente nos no ta hayando mesun hopi keho tocante esaki den comparacion cu 2 of 3 aña atras. Nos a haci investigacion pa purba di trece solucion pa e comerciantenan y consumidornan,  pero ta hopi dificil pa saca un conclusion concreto na kico por ta causando esaki” , Sra.Geerman a splica Bon Dia.

Segun Sra.Geerman, un di e cosnan cu nan a investiga ta e tipo di plastico cu ta wordo uza y esaki ta wordo cumpra door di e mesun distribuidor aki na Aruba mes. E marca di plastico ‘Darnel’ ta esun di mas uza aworaki cu un calidad mas halto y e ta wordo distribui door di e compania Carex. Salubridad Publico a bishita e tereno pa asina mira con ta para cu e opslagplaats , por ehempel si e plastico aki ta para banda di habon  of otro tipo di quimico prome cu e jega e supermercadonan y no a haya nada cu ta indica cu esaki por ta e motibo di e holo y smaak.

E articulo completo riba e topico aki lo sali den corant Bon Dia Aruba proximo.