Ayera den oranan di mainta a tuma luga un reunion general y accion na Dr. Horacio Oduber Hospital, caminda trahadonan di hospital, FSMLA y Bloedbank a pone trabao abao pa un ora como protesta pa e recorte di 5.5% y tambe e recorte di 60 miyon florin den e sector di cuido.

Durante un conferencia di prensa den presencia di algun medio di comunicacion local, presidente di Sindicato ABV, Gina Maduro, a informa cu ABV a tene su reunion general pa su miembronan laborando na hospital, FSLMA y Bloedbank cy tabata toca e tema di inkorting cu manera ta conoci desde comienso di e pandemia, april 2020, sector di cuido ta e prome cu a entrega.

Na momento cu den luna di maart a declara pandemia na Aruba y a bay den lockdown, Maduro ta recorda, na fin di april sector di cuido a entrega 5.5% locual tabata un di e condicionnan. Y aparte tambe di e 12.6%, sector di cuido a haya un recorte di 60 miyon florin pa aña, cinco miyon pa luna, locual ta conta pa ImSan, Respaldo, FSLMA y HOH.

“Den pleno pandemia a bin cu un decision cu te dia di awe nos no sa con a yega na e suma aki. Un locura total pasobra no ta normal cu den pleno pandemia net den e sector di cuido bo ta bay corta asina brutal”, Maduro a bisa.

El a subraya cu sindicato ABV no a para keto y tabata trahando duro y aunke nan no tabata para pafo y protesta of tene accion ABV a cera cabes hunto cu e sector di cuido completo y a manda diferente carta di protesta.

Segun el a enfatisa, nan a manda carta pa Parlamento di Aruba, Gobierno di Aruba y Gobernador, 1ste y 2de kamer, Den Haag y Secretario di Estado. “Por lo menos dos biaha a presenta na Parlamento pa haci un presentacion di kico ta e consecuencia y tur hende a splica nan dolor di kico nan ta pasando pasobra e tin efecto ariba e cuido total”, Maduro a agrega,

Maduro a indica cu lamentablemente tres siman pasa henter sector di cuido a haya un carta unda nan ta wordo informa cu e recorte lo sigui pa 2022 y conforme landspakket e lo keda pa cinco aña mas. Esey, el a señala, ta pone sector di cuido “lomba contra muraya” y esaki tin consecuencia drastico pa e clase trahado tambe.

“Tur caminda tin e problema, ImSan tin su retonan, Respaldo tin su retonan, FSLMA tin su retonan, pero pa loke ta trata HOH su retonan hopi mas dificil pasobra e ta un organisacion mas grandi, e ta e unico hospital cu gran parti di tur e facilidadnan”, el a subraya.

El a menciona cu nan ta na mesa bezig cu un CAO, pero cu esaki ta dificil pa negosha. El a remarca cu e trahadonan ta keda entrega y aworaki hospital a haya e carta cu lo sigui e recorte di 5.5%, locual, segun el a splica, pa hospital ta significa 11 miyon plus nan no a haya e indexering di e 2% y door di e construccion tambe tin problema pasobra falta cama, tin solamente 114 cama y no tin entrada.

“Dus hospital ta den un reto grandi y na unda door di tur e recorte nos lo mester bay entrega mas di locual cu nos ta entrega te cu lo por bi un reorganisacion, locual kiermen cu lo por manda hende cas y esey ABV ta totalmente contra pasobra e sector di cuido, netamente den pleno pandemia ora cu hopi hende por a keda cas, nos a traha incansablemente pa atende cu tur e pashentnan di covid, kiermen nos no por a keda cas”, Maduro a expresa.

El a subraya cu tabatin periodo ora cu e trahadonan di hospitalmes a cuminsa bira malo, shift di 12 ora di trabao a bin na vigor pasobra nan mester a keda duna e cuido. El a menciona tambe cu nan a hasta yuda Corsou y Boneiro durante e pandemia.

Maduro a recorda cu na 2008 caba nan a experiencia un reorganisacion unda a manda esunnan cu ta traha na pia di cama di pashent cas. “Dicon semper den situacion asina net e sector di cuido ta esun cu tin cu sufri. Nos a pasa den dje caba, nos sa kico e ta y nos no kier pa esaki yega”, el a agrega.

El a indica tambe cu aunke cu e sa cu tur hende ta bringa pa nan miembronan, nan problema ta hopi serio pasobra ya a yega na e punto cu ta papia di un reorganisacion. Locual el a enfatisa tanto dunado di trabao como sindicato no kier pa yega na dje. Nos ta para fuerte, nos ta para hunto.

Na mesun momento Maduro a menciona cu den 2021 nan a entrega beneficionan secundario, por ehempel prima di pensioen, tanto dunado di trabao como trahado a entrega pa asina no bay den salario directo pasobra na 2020 juli te december a entrega 5.5% y esaki tabatin consecuencia grandi pa hospital caminda un grupo grandi di trahado a bandona hospital.

El a remarca cu tabata dificil pa haya waarnemers, specialista, pasobra unabes cu pone e recorte di 5.5% den e contract, e specialistanan ta prefera di bay pasobra, segun Maduro ta bisa, nan ta bin pa traha y no pa entrega. “Esey ta e diferencia, hospital ta un organisacion multicultural, nos no tin tur e profesionalnan local, nos ta depende di stranhero y e stranheronan ta bin ‘kinan pa traha y no pa entrega”, el a enfatisa.