Hoge Raad a sostene veredicto di HOF: Matrimonio di mesun sexo ta un realidad na Aruba

Manera ya caba ta conoci pa 9or di mainta di ayera (ora di Aruba) Corte di Casacion na Den Haag a dicta su sentencia den e caso di apertura di matrimonio pa parehanan di mesun sexo. Corte a dicta cu tanto Aruba, como Corsou, mester habri matrimonio pa parehanan di mesun sexo.

Dia 6 di december 2022, Gemeenschappelijk Hof van Justitie di Aruba, Corsou, Sint Maarten y Boneiro, Sint Eustatius y Saba a dicta su veredicto den cual ta indica cu Aruba y Corsou mester habri matrimonio pa parehanan di mesun sexo. Esaki a keda sosteni ayera pa Hoge Raad na Den Haag den un veredicto altamente spera pa comunidad di Aruba.

E sentencia di Hoge Raad ta indica cu na Aruba y Corsou e leynan actual ta dicta cu matrimonio ta solamente entre parehanan heterosexual, esta un homber y un muhe. Na Aruba, Fundacion Orguyo hunto cu un pareha di personanan di mesun sexo cu kier casa a entama un caso contra Gobierno di Aruba.

E demandantenan ta sostene cu e leynan aki ta contra di e prohibicion di discriminacion cu ta basa riba tratado internacional y Constitucion di Aruba. Cu e caso aki, e meta di demandantenan tabata pa habri matrimonio pa parehanan di mesun sexo.

Den su veredicto Corte den Prome Instancia di Aruba a dicta cu mientras parehanan di mesun sexo no por casa, y si no por ofrece e parehanan aki un otro alternativa, manera por ehempel manera un union registra, e ta contra articulo 8 di derecho di bida priva y famia y articulo 14 di prohibicion di discriminacion di e Convension Europeo pa proteccion di Derechonan Humano (EVRM) y cu Pais Aruba ta actua di manera ilegal contra demandantenan.

Den e caso di apelacion, HOF a dicta den ambos caso cu na momento cu ta exclui parehanan di mesun sexo di casa e ta bay contra di e prohibicion di discriminacion consagra den e Constitucion di tanto Aruba y Corsou. HOF tambe a indica den su veredicto cu e introduccion di union registra na Aruba no ta un alternativa completo.

HOF a tuma den consideracion cu e obhecionnan di e grupo cu ta contra apertura di matrimonio pa parehanan di mesun sexo hopi biaha tin un fundeshi religioso. HOF a remarca cu libertad di religion mester ta garantisa, pero e no ta bay asina leu cu por impone e norma y balornan religioso di un riba otro hende.

HOF a dicta cu su decision no ta bay contra di su tarea di forma leynan pa habri matrimonio pa parehanan di mesun sexo. El a dicidi cu na e momento cu su pronunciacion bira definitivo, un matrimonio entre dos persona di diferente of di mesun sexo por tuma y cu e oficial di Estado Civil mester colabora.

Gobierno di Aruba a apela e decision aki na e Hoge Raad. Gobeirno a confirma durante e tratamento di e caso dia 10 di november 2023 na e Hoge Raad cu nan ta acepta e decision di HOF cu e exclusion di matrimonio pa parehanan di mesun sexo ta bay en contra di e prohibicion di discriminacion cu ta consagra den e Constitucion.

Nan punto pa bay Casacion ta pasobra nan ta contra e decision di HOF cu ta hues mes por habri matrimonio pa parehanan di mesun sexo. Gobierno di Aruba ta argumenta cu corte a sinta den stoel di gobierno y nan ta kere cu ta den mas di legislado pa elimina discriminacion.

Hoge Raad a sostene e decision di HOF. Hoge Raad ta afirma cu den un caso manera esun aki mester evalua dos interes: e interes cu participantenan por haya proteccion legal efectivo directamente y e interes cu e hues mester eherce moderacion ora e ta intervini den e leynan.

Den e caso aki ta trata di discriminacion riba base di orientacion sexual cu ta impedi e participantenan nan libertad pa organisa nan bida personal. Di otro banda, door di elimina e falta legal, e hues ta interveni den e leynan di un pais. Hoge Raad ta resalta cu e hues mester actua cu moderacion; pa leynan di un pais e prioridad ta di e legislador.

Hoge Raad ta considera cu den e caso aki HOF por dicidi pa habri matrimonio pa parehanan di mesun sexo. HOF a tuma den consideracion cu e falta legal ta existi pa bastante tempo, cu e intervencion di e hues no ta tecnicamente complica y cu e manera pa habri matrimonio pa parehanan di mesun sexo no ta depende di otro decisionnan politico.

E sentencia di Hoge Raad ta implica cu e decision di HOF ta definitivo y pues na Aruba, y na Corsou, awor matrimonio pa parehanan di mesun sexo ta un realidad.

Gobierno di Aruba a reaccion ariba rednan social riba e decision di Hoge Raad indicando cu nan lo cumpli cu e veredicto.

“Hoge Raad awe a dicta cu exclusion di parehanan di mesun sexo di matrimonio ta un discriminacion cu ta en pugna cu nos Constitucion. Y a confirma e veredicto di Corte Comun di Husticia di 6 di december 2022. Cu e veredicto di Hoge Raad, matrimonio pa parehanan di mesun sexo ta bira posibel na Aruba, na e mesun forma cu matrimonio di parehanan di sexo opuesto. Gobierno di Aruba lo cumpli cu veredicto di Hoge Raad,” nan a publica.

Mirando e posicion y conseho di Abogado General, cual tabatin indicacionnan fuerte cu Hoge Raad lo dicta na fabor di Matrimonio di mesun sexo y e hecho cu Gobierno di Aruba a admiti den Hoge Raad cu si tin violacion di Constitucion cu exclusion di Matrimonio di mesun sexo, hopi ta cuestiona si gobierno a tuma e oportunidad pa den otro palabra laba man y laga Hoge Raad duna un sentencia, pa na su turno nan bisa cu nan mester cumpli cu e sentencia aki.