Diaranson 21 di augustus y diabierna 23 di augustus 2024, e Fiscal General di Aruba y Fiscal General di Corsou, Sint Maarten, y di Boneiro, Sint Eustatius y Saba, hunto cu presidente di Corte Comun di Husticia a firma e Convenio y Reglamento di Proceso Penal.
Cu e firma di e acuerdo aki, pa prome biaha Hof ta haci acuerdo di trabou cu e dos Ministerionan Publico, pues e biaha aki si ta inclui Ministerio Publico di Aruba. E ultimo acuerdo tabata firma solamente cu e Ministerio Publico di Corsou, di Sint Maarten y di Boneiro, Sint Eustatius y Saba.
E convenio aki ta establece acuerdonan riba un metodo uniforme pa e tratamento di casonan penal y capacidad di audiencia den cada sede di Hof. Den e reglamento di proceso penal, cual tambe a wordo firma pa partinan, ta elabora detayadamente tocante e acuerdonan di trabou. E convenio y e reglamento di proceso penal lo drenta den vigor dia 1 di september.
Mediante un comunicado, Corte Comun di Husticia ta splica cu e convenio ta enfoca specialmente riba acuerdonan tocante e provision di audiencianan na tur sede di e Hof y lo ser firma cada aña.
E firma di e convenio aki ta marca otro logro importante, no solamente pasobra e ultimo convenio ta di algun aña pasa, si no tambe pasobra e acuerdo nobo aki pa prome biaha ta wordo compaña pa un reglamento di proceso penal. Cu e introduccion di e reglamento di proceso penal, e reglamentonan di proceso cu ya ta existi pa casonan civil y derecho administrativo, ta wordo completa.
Hof ta remarca cu e reglamento di proceso penal tin como obhetivo trece uniformidad den e manera di trata casonan penal pa Husticia, Hof y Ministerio Publico, tanto den prome instancia como den apelacion. Unda cu tin mester, e reglamento ta duna espacio pa atencion specifico pa haci husticia den siituacionnan local.
E reglamento ta enfoca tambe riba mehoracion di varios proceso, manera entre otro planificacion y designacion, compilacion di dossiernan y e proceso administrativo despues cu un decision wordo tuma. Un meta importante di e reglamento ta pa contribui na e reduccion di tempo pa proceso di casonan penal.
Por ultimo, Hof ta indica, e reglamento ta proporciona un procedura pa desaroyo y mehoracion, y lo wordo ahusta pronto na e Codigo di Procedura Penal nobo cu ya caba a drenta na vigor na Aruba.
